BAKI,VOA Orxan Qədirzadə

Birləşmiş Millətlər Təşkilatının Uşaq Fondu bildirib ki, son bir həftə ərzində Livanda hər 24 saatda orta hesabla 11 uşaq öldürülüb və ya yaralanıb.

Qurumun açıqlamasına görə, İsrailin atəşkəsə baxmayaraq ölkə ərazisində hava zərbələrini genişləndirməsi nəticəsində son yeddi gündə ümumilikdə 77 uşaq həyatını itirib və ya müxtəlif dərəcəli xəsarətlər alıb.

Məlumatda qeyd olunur ki, çərşənbə gecəsindən cümə axşamına keçən gecə ərzində İsrail ordusu Livanın cənubundakı şəhər və kəndlərə intensiv zərbələr endirib. Bu əməliyyatlar İsrailin bölgənin yeni hissələrini “döyüş zonası” elan etməsindən sonra həyata keçirilib.

Cümə axşamı günü isə İsrailə məxsus hava zərbəsi Beyrutun cənub ətrafındakı yaşayış binasını hədəfə alıb.

Atəşkəsin qüvvədə olmasına baxmayaraq, İsrail ordusu ilə Hizbullah arasında Livanın cənubunda qarşıdurmaların davam etdiyi bildirilir.

UNICEF-in məlumatına görə, apreldə qüvvəyə minən atəşkəsdən bu günə qədər 55 uşaq öldürülüb, 212 uşaq isə yaralanıb.

Qurumun sözçüsü Rikardo Pires uşaqlar arasında itkilərin miqyasını “dəhşətli” adlandırıb.

Vaşinqtonun vasitəçiliyi ilə 16 aprel tarixində elan edilən atəşkəsin İsrail ilə İranın dəstəklədiyi Hizbullah arasında martın 2-dən davam edən müharibəni dayandırması nəzərdə tutulurdu.