BAKI,VOA Yusif Şərifzadə
Hizbullah İsrail və Livan arasında Vaşinqtonda keçirilən danışıqları tənqid edərək, onları davam edən hərbi əməliyyatlar fonunda “pulsuz güzəştlər” kimi qiymətləndirib.
VOA xəbər verir ki, Livan və İsrail rəsmiləri hazırda Vaşinqton şəhərində danışıqlar aparırlar. Tərəflər sonuncu dəfə aprelin 23-də Ağ Evdə görüşmüşdülər. Həmin görüşdə ABŞ Prezidenti Donald Tramp İsrail və Livan arasında atəşkəsin üç həftə uzadıldığını açıqlamış və iki ölkə arasında irəliləyiş əldə olunacağına ümid etdiyini bildirmişdi.
Tramp o vaxt bildirib ki, üç həftəlik atəşkəs dövründə İsrailin Baş naziri Benjamin Netanyau və Livan Prezidenti Cosef Aun Vaşinqtonda tarixi bir zirvə görüşü keçirə bilər.
Lakin bu plan baş tutmayıb. Aun həmin görüşdən əvvəl təhlükəsizlik razılaşmasının əldə olunmasının və İsrail hücumlarının dayandırılmasının zəruri olduğunu bildirib.