BAKI,VOA,Yusif Şərifzadə

ABŞ və İran arasında davam edən diplomatik proses tərəflərin qarşılıqlı etimadsızlığı və geosiyasi maraqları səbəbindən mürəkkəb mərhələyə daxil olub.

VOA xəbər verir ki, bu barədə London Kral Kollecinin qonaq müəllimi Samir Puri “Al Jazeera” telekanalına açıqlamasında bildirib.

Onun sözlərinə görə, Vaşinqton və Tehran bir-birinə qarşı “dərin antaqonizm” hiss edir və hər iki tərəf danışıqlardan qalib kimi çıxmağa çalışdığı üçün “qarşılıqlı çıxılmazlıq” vəziyyəti yaranıb.

Puri qeyd edib ki, İran bir neçə həftə davam edən yüksək intensivlikli müharibədən ciddi zərər görüb və hazırkı mərhələdə əsas seçim diplomatik çıxış yolu tapmaq və ya yenidən genişmiqyaslı hərbi əməliyyatlar riskini qəbul etməkdir.

Ekspert hesab edir ki, tərəflər arasında razılıq üçün ən real imkan nüvə zənginləşdirilməsi məsələsində kompromisin əldə olunmasıdır.

O bildirib ki, İran elə bir sazişə qoşulmalıdır ki, bunu ciddi güzəşt kimi qəbul etməsin, ABŞ isə həmin razılaşmanı siyasi və diplomatik uğur kimi təqdim edə bilsin.

Samir Puri əlavə edib ki, Hörmüz boğazı ilə bağlı ayrıca razılaşmanın əldə olunması da mühüm əhəmiyyət daşıyır. Onun fikrincə, hazırkı mərhələdə bu məsələ nüvə zənginləşdirilməsi mövzusundan daha mürəkkəb görünür.