BAKI,VOA, Orxan Qədirzadə

Səudiyyə Ərəbistana məxsus Kral Salman Humanitar Yardım və Dəstək Mərkəzi tərəfindən Qəzza zolağında həyata keçirilən humanitar yardım çərçivəsində Xan Yunis bölgəsində həssas əhali qruplarına 1 210 ədəd ərzaq səbəti paylanıb.

VOA xəbər verir ki, bu yardım ümumilikdə 7 260 nəfəri əhatə edib. Eyni zamanda, təşkilatın yeni humanitar karvanı Qəzzaya daxil olaraq böyük həcmdə ərzaq məhsulları gətirib. Yardımlar Səudiyyə Mədəniyyət və İrs Mərkəzi vasitəsilə paylanır.

Bundan əlavə, təşkilatın mərkəzi mətbəxi tərəfindən Qəzzanın mərkəzi və cənub bölgələrində yaşayan ehtiyaclı şəxslər üçün 25 min isti yemək təqdim olunub.

Qeyd olunur ki, bu təşəbbüs Səudiyyə Ərəbistanının Qəzzadakı humanitar böhran fonunda fələstinlilərə dəstək məqsədilə həyata keçirdiyi genişmiqyaslı yardım proqramının tərkib hissəsidir.

Məlumat üçün bildirək ki, KSrelief 2015-ci ildən etibarən Fələstində ərzaq təhlükəsizliyi, səhiyyə, su və sanitariya, təhsil və fövqəladə yardım sahələrini əhatə edən 152 layihə icra edib. Bu layihələrin ümumi dəyəri təxminən 537 milyon ABŞ dolları təşkil edir.