BAKI,VOA, Nailə Babazadə

Amerika Birləşmiş Ştatlarının vasitəçiliyi ilə Beyrut və Tel-Əviv nümayəndələri arasında bu gün keçiriləcək ikinci raund hazırlıq görüşləri İsrail ordusunun Livandakı hərbi fəaliyyətlərinin kölgəsində reallaşacaq.

VOA xəbər verir ki,aprelin on yeddisində qüvvəyə minən on günlük müvəqqəti atəşkəsin başa çatmasına sayılı günlər kala baş tutacaq bu görüş regionda gərginliyin azaldılması baxımından böyük əhəmiyyət kəsb edir.

Vaşinqtonda ABŞ Dövlət Departamentinin ev sahibliyi ilə keçiriləcək toplantıda Dövlət katibi Marko Rubio Livanın Vaşinqtondakı səfiri Nada Həmədə Muavvad və İsrailin səfiri Yehiel Leyter iştirak edəcəklər. Müzakirələrə həmçinin ABŞ-ın Beyrut və Tel-Əvivdəki səfirlərinin də qatılacağı gözlənilir. Livan tərəfi bu görüşdə atəşkəs müddətinin uzadılmasını işğal altındakı kəndlərdə evlərin dağıdılmasının və ərazilərin təxrib olunmasının dərhal dayandırılmasını rəsmi şəkildə tələb edəcək.

Aprelin on dördündə reallaşan ilk görüş min doqquz yüz doxsan üçüncü ildən bəri İsrail və Livan arasında ən yüksək səviyyəli birbaşa təmas kimi tarixə düşüb. ABŞ tərəfi həmin görüşün səmərəli keçdiyini və tərəflərin birbaşa danışıqlara başlamaq mövzusunda razılığa gəldiyini açıqlasa da Livan tərəfi suverenlik və ərazi bütövlüyü prinsiplərini ön plana çəkir. Livan Prezidenti Cozef Avn bildirib ki birbaşa danışıqlar yalnız İsrailin atəşkəs qaydalarına tam əməl etməsindən sonra başlaya bilər.

Hazırda cənub bölgəsində İsrail ordusunun hücumları nəticəsində biri jurnalist olmaqla beş nəfərin həyatını itirməsi və yaşayış binalarının dağıdılması atəşkəsin kövrəkliyini nümayiş etdirir. Hizbullahın Baş katibi Naim Qasım isə hücumlar davam etdiyi müddətdə birbaşa müzakirələrə qarşı olduqlarını və prioritetin İsrail qoşunlarının Livan ərazilərindən tamamilə çıxarılması olduğunu vurğulayır. Beynəlxalq ictimaiyyət Vaşinqtondan gələcək qərarların bölgədə qalıcı sülhə yol açıb-açmayacağını yaxından izləyir.