BAKI,VOA
Qətərin Baş naziri və Xarici İşlər naziri Şeyx Məhəmməd bin Əbdürrəhman bin Casim Al Tani Antalya Diplomatiya Forumu çərçivəsində Türkiyənin Xarici İşlər naziri ilə regionda gərginliyin azaldılması yollarını müzakirə edib.
VOA xəbər verir ki, Qətər Xarici İşlər Nazirliyindən verilən rəsmi məlumata görə, görüş zamanı tərəflər regional sabitliyin təmin olunması və münaqişələrin de-eskalasiyası (gərginliyin azaldılması) üçün strateji addımları nəzərdən keçiriblər. Baş nazir müzakirələr zamanı vasitəçilik prosesinin əhəmiyyətini xüsusi vurğulayaraq bildirib.
"Bütün tərəflər regionda davamlı sülhə nail olmaq üçün hazırda davam edən vasitəçilik səylərinə müsbət cavab verməlidirlər."-deyə o bildirib.
Bu görüş Türkiyə və Qətərin regiondakı münaqişələrin həllində birgə diplomatik cəbhədə çıxış etdiyini və hər iki ölkənin beynəlxalq vasitəçilik missiyalarında həlledici rol oynamağa davam etdiyini göstərir.