BAKI,VOA, Fərid Mikayılov
Səudiyyə Ərəbistanı Pakistanın maliyyə sabitliyini dəstəkləmək üçün yeni qərar qəbul edib.
VOA xəbər verir ki, Riyad Pakistanın tədiyə balansını gücləndirmək məqsədilə əlavə 3 milyard dollar maliyyə yardımı ayırmağa razılaşıb.
Məlumata əsasən, bu vəsait Birləşmiş Ərəb Əmirliklərinə olan böyük həcmli borc ödənişləri fonunda Pakistanın maliyyə yükünü azaltmağa yönəlib.
Qeyd olunub ki, Səudiyyə Ərəbistanı eyni zamanda Pakistan Mərkəzi Bankında yerləşdirilmiş 5 milyard dollarlıq depozitin müddətini də uzadıb.
Bildirilib ki, Pakistanın bu ay BƏƏ-yə 3,5 milyard dollar borc ödəməsi gözlənilir ki, bu da ölkənin valyuta ehtiyatlarının əhəmiyyətli hissəsini təşkil edir.
Məlumata görə, Pakistan Beynəlxalq Valyuta Fondu ilə proqram çərçivəsində valyuta ehtiyatlarını artırmağı hədəfləyir və bu dəstək həmin məqsədə çatmaq üçün mühüm rol oynayacaq.
Qeyd edilib ki, bu addım Riyad və İslamabad arasında strateji tərəfdaşlığın daha da möhkəmləndiyini göstərir.