BAKI,VOA, Nailə Babazadə

İsrail Başınaziri Benyamin Netanyahu, bazar günü yenidən başlaması planlaşdırılan korrupsiya məhkəməsinin təxirə salınması üçün Qüds Regional Məhkəməsinə müraciət edib.

VOA xəbər verir ki, Netanyahu Yaxın Şərqdəki mövcud təhlükəsizlik vəziyyətini və ABŞ ilə İran arasında əldə olunmuş müvəqqəti atəşkəsdən sonrakı diplomatik prosesləri əsas gətirib.

Məhkəməyə təqdim edilən rəsmi vəsatətdə bildirilir ki, son zamanlar bölgədə baş verən dramatik hadisələr və "məxfi diplomatik-təhlükəsizlik səbəbləri" başınazirin ən azı iki həftə ərzində ifadə verməsini qeyri-mümkün edir. Vəsatətdə bu gizli səbəblərin təfərrüatlarının əks olunduğu möhürlü zərfin hakimlərə təqdim edildiyi qeyd olunub. Prokurorluğun rəyindən sonra məhkəmənin qəti qərarı bəlli olacaq.

Netanyahunun korrupsiya davasına 28 fevralda ABŞ və İsrailin İrana hücumlarından sonra ara verilmişdi. Atəşkəs elan edildikdən sonra prosesin bu bazar günü davam etdirilməsi qərara alınmışdı. Başınazir "1000", "2000" və "4000" nömrəli sənədlər kimi tanınan üç ayrı iş üzrə "rüşvət, fırıldaqçılıq və vəzifə səlahiyyətlərindən sui-istifadə" ittihamları ilə mühakimə olunur.

Məhkəmə prosesi təxminən 6 ildir davam edir. Qeyd edək ki, ABŞ Prezidenti Donald Trump 2025-ci ilin noyabrında İsrail Prezidenti İshaq Hersoqa məktub göndərərək Netanyahunu əfv etməyə çağırmışdı. Əvvəllər əfv tələb etməyəcəyini deyən Netanyahu da 2025-ci ilin sonunda rəsmən Hersoqa əfv müraciəti ünvanlayıb.