BAKI, VOA, Nailə Babazadə
Çərşənbə günü Körfəz regionu boyunca hava hücumundan müdafiə sistemləri İran tərəfindən mülki obyektləri və şəxsi mülkiyyəti hədəf alan onlarla raket və dronu zərərsizləşdirməyə davam edib.
VOA xəbər verir ki, gərginliyin artdığı bir vaxtda Körfəz dövlətləri bəyan ediblər ki, regionun gələcək təhlükəsizliyi ilə bağlı imzalanacaq hər hansı sazişdə onlar əsas tərəf kimi iştirak etməlidirlər. Qətər Xarici İşlər Nazirliyinin sözçüsü Məcid əl-Ənsari keçirdiyi brifinqdə bildirib ki, bütün "qırmızı xətlər" artıq keçilib, xüsusilə infrastruktur və nüvə obyektlərinin hədəf alınması müharibənin miqyasını təhlükəli həddə çatdırıb.
Qətər rəsmisi Hörmüz boğazının bağlanmasının qlobal enerji təhlükəsizliyinə vurduğu zərbədən bəhs edərək, beynəlxalq tərəfdaşlarla birlikdə tədarük zəncirinin qorunması üçün fəaliyyət göstərdiklərini bildirib. O, həmçinin Pakistanın vasitəçilik səylərini dəstəklədiklərini, lakin ABŞ-ın İrana mümkün quru əməliyyatından ciddi narahat olduqlarını qeyd edib. Bu diplomatik aktivlik fonunda Səudiyyə Ərəbistanı ordusu Riyad və Şərq bölgəsinə atılan 8 ballistik raketi və 12 dronu məhv edib. Əl-Xərc bölgəsində raket qalıqlarının düşməsi nəticəsində iki nəfər yaralanıb, bir neçə ev və avtomobil zədələnib.
Müharibə şəraitinə baxmayaraq, Səudiyyə Ərəbistanının Həcc və Ümrə Nazirliyi zəvvarların təhlükəsiz gəlişini təmin etmək üçün xüsusi əməliyyat otağı yaradıb. Nazir Tofiq ər-Rabiə Mədinədə keçirilən forumda fövqəladə hallara tam hazır olduqlarını vurğulayıb. Eyni zamanda, Küveyt Beynəlxalq Hava Limanında İranın PUA hücumu nəticəsində yanacaq çənində güclü yanğın baş verib. Səlahiyyətli qurumlar hücumun İraqdakı İranpərəst qruplaşmalar tərəfindən həyata keçirildiyini ehtimal edirlər. Küveyt ordusu son 24 saat ərzində 5 ballistik raketi və 7 dronu zərərsizləşdirdiyini açıqlayıb.
Birləşmiş Ərəb Əmirliklərində isə Füceyrə bölgəsində dronun zərərsizləşdirilməsi zamanı düşən qalıqlar bir Banqladeş vətəndaşının ölümünə səbəb olub. Bu hadisə fonunda BƏƏ Prezidenti Şeyx Məhəmməd bin Zayed Əl Nəhyan və Qətər Əmiri Şeyx Tamim bin Həməd Əl Tani Əbu-Dabidə görüşərək İrana məxsus terror hücumlarının qlobal iqtisadiyyata təsirini müzakirə ediblər. Liderlər mülki infrastruktura qarşı hücumların dayandırılması üçün beynəlxalq təzyiqlərin artırılmasının vacibliyini qeyd ediblər. Bəhreyn rəsmiləri də ölkənin biznes obyektlərindən birinə endirilən zərbə nəticəsində yaranan yanğının söndürüldüyünü bildiriblər.