BAKI,VOA, Nailə Babazadə

İsrail qüvvələri fələstinli müsəlmanların Fitr bayramı namazını qılmalarına icazə verməyib. Paytaxt Qüdsün strateji nöqtələrində dinc sakinlərə qarşı güc tətbiq edildiyi bildirilir.

VOA xəbər verir ki, Qüds bələdiyyəsinin rəsmi bəyanatında qeyd olunur ki, İsrail qüvvələri namaz qılmaq istəyən insanları Dəməşq qapısı (Bab əl-Amud) bölgəsindən zorla uzaqlaşdırıblar. Məlumata görə, bayram namazını Əl-Əqsa məscidi yaxınlığında qılmağa çalışan fələstinlilərə qarşı Sahirə qapısı (Bab əs-Sahirə) istiqamətində gözyaşardıcı qaz bombalarından istifadə edilib.

Hadisə bayramın ilk saatlarında, minlərlə insanın ibadət üçün toplandığı vaxt baş verib. İsrail təhlükəsizlik qüvvələrinin Qüdsün qədim şəhər hissəsinə giriş-çıxışı məhdudlaşdırdığı və namaz vaxtı əraziyə əlavə qüvvələrin cəlb olunduğu bildirilir. Bu addımlar fələstinlilər arasında böyük narazılığa və ərazidə gərginliyin daha da artmasına səbəb olub.

Qeyd edək ki, bu hadisələr regionda davam edən hərbi eskalasiya və İsrailin Fələstin ərazilərində tətbiq etdiyi sərt məhdudiyyətlər fonunda baş verir. Beynəlxalq təşkilatlar dəfələrlə müqəddəs yerlərdə ibadət azadlığının təmin olunması barədə çağırışlar etsələr də, hələlik ərazidə sabitlik əldə olunmayıb.