BAKI,VOA
İsrailin Baş naziri Benyamin Netanyahu beynəlxalq ictimaiyyətdə ciddi narazılıq doğuran çıxışında mənəvi dəyərləri kənara qoyaraq "güclü olan sağ qalır" fəlsəfəsini açıq şəkildə müdafiə edib. O, öz siyasətinə bəraət qazandırmaq üçün tarixdəki qanlı imperiyaların və amansız gücün ədalətdən daha üstün olduğunu iddia edib.
Televiziya vasitəsilə xalqa müraciət edən Netanyahu bir tarixçinin "Məsihin Çingiz xan qarşısında heç bir üstünlüyü yoxdur" sitatını gətirərək, müasir dünyada mənəviyyatın və haqlı olmağın qələbə üçün kifayət etmədiyini bildirib.
Gücün mənəviyyatdan üstünlüyü
Netanyahu çıxışında məşhur tarixçi Vil Dyurantın "Tarixin dərsləri" kitabına istinad edərək, tarixin amansız gücün və qəddarlığın mülayimlik üzərində qələbə çaldığını sübut etdiyini deyib: "Bu dünyada sadəcə mənəviyyatlı olmaq, ədalətli olmaq və ya haqlı olmaq kifayət deyil. Tarix sübut edir ki, güc və nüfuz şərin xeyir üzərində, təcavüzün isə etidal üzərində qələbə çalmasına imkan verən əsas amillərdir."
O, həmçinin əlavə edib ki, ABŞ-ın rəhbərlik etdiyi demokratik ölkələr özlərini müdafiə etmək üçün öz iradələrini yenidən dünyaya diktə etməli və güc tətbiqindən çəkinməməlidirlər.
Netanyahunun bu skandal bəyanatları İsrailin Qəzza, İordan çayının qərb sahili, Livan və İranda həyata keçirdiyi hərbi əməliyyatlar səbəbindən beynəlxalq təcridlə üzləşdiyi bir vaxta təsadüf edir. Xatırladaq ki, 28 fevral 2026-cı ildən bəri İsrail və ABŞ-ın İrana qarşı başlatdığı müharibədə Əli Xamenei daxil olmaqla yüzlərlə insan həlak olub.
İsrail son iki yarım il ərzində Qəzza, Livan və İranda genişmiqyaslı müharibələr aparmaqla yanaşı, Suriya, Yəmən və Qətərə də hava zərbələri endirib. Eyni zamanda, Fələstin, Livan və Suriyada işğal ərazilərini genişləndirərək müstəqil Fələstin dövlətinin qurulmasına qarşı çıxmağa davam edir.
Sosial mediada sərt reaksiyalar
Netanyahunun Çingiz xan müqayisəsi sosial şəbəkələrdə böyük qəzəblə qarşılanıb. Bir çox istifadəçi ona "Çingiz xan imperiyasının da sonda zülm ucbatından çökdüyünü" xatırladıb. Bəzi şərhçilər isə şərin xeyir üzərində qələbə çalacağını iddia etdiyi üçün onu "şeytanın fəlsəfəsini təbliğ etməkdə" ittiham ediblər.