BAKI, VOA, Nailə Babazadə

Birləşmiş Ərəb Əmirliklərinin strateji əhəmiyyətli Fuceyra limanı pilotsuz uçuş aparatlarının (PUA) hədəfinə çevrilib. "Bloomberg"in yaydığı məlumata görə, hücum nəticəsində limandakı neft anbarlarında güclü yanğın başlayıb.

VOA xəbər verir ki, hadisə yerindən çəkilən görüntülərdə limandan qatı tüstü buludlarının yüksəldiyi müşahidə olunur. Yanğın və təhlükəsizlik riskləri səbəbindən limandakı bəzi neft yükləmə əməliyyatlarının və digər fəaliyyətlərin müvəqqəti olaraq dayandırıldığı bildirilir.

Bu hücum fevralın 28-də ABŞ və İsrailin İrana qarşı başlatdığı hərbi əməliyyatlara cavab olaraq Tehranın həyata keçirdiyi əks-həmlələrin tərkib hissəsi kimi qiymətləndirilir. İran rəhbərliyi İsraillə yanaşı, ABŞ bazalarının yerləşdiyi BƏƏ, Qətər və Bəhreyn kimi ölkələri də hədəf seçdiyini bəyan edib.

Xatırladaq ki, ABŞ-İsrail hücumları nəticəsində İranın ali lideri Ayetullah Əli Xameneyi də daxil olmaqla çox sayda yüksək rütbəli rəsmi həyatını itirib. İran tərəfinin məlumatına görə, ölkədə davam edən zərbələr nəticəsində ölənlərin sayı 1348-i keçib, 17 mindən çox insan isə yaralanıb. Fuceyra limanındakı son hadisə qlobal enerji bazarlarında tədarük zənciri ilə bağlı narahatlıqları daha da artırıb.