BAKI,VOA

İsrailin Livanın müxtəlif bölgələrinə son 24 saat ərzində həyata keçirdiyi hava hücumları nəticəsində azı 39 nəfər həyatını itirib, çox sayda insan yaralanıb.

VOA xəbər verir ki, İsrailə məxsus döyüş təyyarələri ölkənin şərq və cənub bölgələrinə, həmçinin paytaxt Beyrutun cənubundakı Dahiya ərazisinə intensiv hava zərbələri endirib.

Məlumata əsasən, ölkənin şərqində yerləşən Nəbi Şit qəsəbəsinə həyata keçirilən 10 hava hücumu nəticəsində 16 nəfər ölüb, 35 nəfər yaralanıb. Cənubdakı Kalaviya qəsəbəsinə edilən hücum zamanı isə 2 nəfər həyatını itirib.

Ed-Duveyr qəsəbəsində həyata keçirilən hücumda 5 nəfər ölüb, 9 nəfər yaralanıb. Kefr Rumman qəsəbəsinə endirilən zərbə nəticəsində isə 2 nəfərin öldüyü bildirilib.

Mərvaniyə qəsəbəsi yaxınlığında bir evin hədəf alındığı hücumda 1 nəfər həyatını itirib.

Sayda şəhərində yerləşən Məqasid İslam Cəmiyyəti binasına endirilən hava zərbəsi nəticəsində 5 nəfər ölüb, 7 nəfər yaralanıb.

İsrailin Toul qəsəbəsində yerləşən İmam Mehdi məscidini hədəf aldığı, hücum nəticəsində məscidin ciddi zərər gördüyü və məscidin müəzzininin öldüyü bildirilib.

Bundan başqa, Kefr Tibnit qəsəbəsində iki ev bombalanaraq dağıdılıb. Cəbşit qəsəbəsinə edilən hücum zamanı isə 2 nəfər həyatını itirib.

Beyrutun cənub ətraflarında yerləşən Cemus, Haret əl-Hureyk, Əl-Hadas və Burc əl-Baracine bölgələrinin də hədəf alındığı hücumlarda 2 nəfərin öldüyü bildirilib.