BAKI, AzerVoice, Orxan Qədirzadə

İsrailin Ali Məhkəməsi çərşənbə günü axşam saatlarında Baş nazir Benyamin Netanyahu hökumətinə 2023-cü il 7 oktyabr hadisələrini araşdırmaq məqsədilə rəsmi istintaq komissiyası yaratmaq üçün bir ay müddətində vaxt verib. Bu qərar, müharibənin başa çatdığının elan edilməsindən sonra Netanyahunun qarşılaşdığı ilk ciddi daxili təzyiq kimi qiymətləndirilir.

Həmin gün “HƏMAS” hərəkatı Qəzza zolağı yaxınlığındakı hərbi bazalara və yaşayış məntəqələrinə hücum etmiş, onlarla israillini öldürmüş və əsir götürmüşdü. Hərəkat bu addımı “işğalçı İsrailin fələstinlilərə və xüsusilə Əl-Əqsa məscidinə qarşı gündəlik cinayətlərinə cavab” adlandırmışdı.

Kəşfiyyat və ordu üçün ən böyük uğursuzluq

İsrail rəsmiləri və hərbi ekspertlər 7 oktyabr hadisələrini ölkənin tarixində ən böyük kəşfiyyat və hərbi fiasko adlandırır. Bu hadisə İsrailin beynəlxalq imicinə və ordusunun nüfuzuna ciddi zərbə vurub.

Ali Məhkəmənin qərarı

Ali Məhkəmə hökumətdən hadisələrin səbəblərini araşdırmaq, məsul şəxsləri müəyyənləşdirmək və ictimai hesabat hazırlamaq məqsədilə rəsmi istintaq komissiyasının yaradılmasını tələb edən ərizəyə baxıb.
Məhkəmənin qərarında qeyd olunur ki:

“Hökumət 30 gün ərzində komissiyanın yaradılması barədə məhkəməyə hesabat təqdim etməlidir, çünki onun yaradılması zəruriliyi ilə bağlı fikir ayrılığı yoxdur.”

İsrailin rəsmi yayımlayıcısı KAN məlumat verir ki, bu qərar Netanyahunun kabinetinə əlavə siyasi təzyiq yaradır və 7 oktyabr hadisələrinin şəffaf araşdırılmasının vacibliyini önə çəkir.