BAKI, AzerVoice, Zeynəb Raminqızı

İsrailin ağır mühasirəsi altında aclıq və ehtiyac içində yaşayan Qəzza zolağında son bir sutkada daha 5 nəfər aclıqdan həyatını itirib.

AzerVoice xəbər verir ki, bu barədə Fələstin Səhiyyə Nazirliyinin yaydığı yazılı açıqlamada bildirilib.

Son 24 saat ərzində daha 5 fələstinli aclıq səbəbilə dünyasını dəyişib. Bununla da, İsrailin mühasirəsi nəticəsində aclıqdan ölənlərin sayı 180-ə yüksəlib. Onlardan azı 93 nəfəri uşaqdır.

İsrailin aylardır davam edən hücumları və humanitar yardımların qarşısını alan blokadası səbəbindən Qəzzada su, dərman, tibbi və gigiyena vasitələrinin kəskin çatışmazlığı müşahidə olunur. Yerli və beynəlxalq təşkilatlar bildirirlər ki, İsrail “aclıq və susuzluqdan bir silah kimi” istifadə edir.

Mülki infrastrukturların 88 faizinin dağıdıldığı bölgədə təxminən 2,3 milyon insan yaşasa da, onlardan 2 milyonu artıq didərgin düşüb. Fələstinlilər gigiyenik şəraitin olmadığı, yoluxucu xəstəliklərin yayıldığı çadırlarda və dolu məktəblərdə sağ qalmağa çalışırlar.

Bütün bu çətinliklərə baxmayaraq, İsrail ordusu hər gün hava və quru hücumlarını davam etdirir, mülki məntəqələri və köçkünlərin sığındığı yerləri bombalayır. Yerli əhali isə həm aclıqla, həm də təhlükəsizliklə bağlı böhranla üz-üzə qalır.