BAKI, AzerVoice

Fransa paytaxtı Parisdə cümə axşamı Suriyanın xarici işlər naziri Əsəd Şeybani ilə İsrailin strateji məsələlər naziri Ron Dermer arasında əvvəlcədən görünməmiş səviyyədə görüş keçirilib. Görüşün ABŞ-ın Suriya üzrə xüsusi elçisi Tom Brakın vasitəçiliyi ilə baş tutduğu bildirilib.

AzerVoice xəbər verir ki, bu haqda Amerikalı diplomat Tom Brak sosial şəbəkə platforması "X" üzərindən yayımladığı açıqlamada bildirib.

“Bu axşam Parisdə suriyalılar və israillilərlə görüşdüm. Məqsədimiz dialoq və gərginliyin azaldılması idi və bunu nailiyyətlə yerinə yetirdik. Bütün tərəflər bu səyləri davam etdirmək öhdəliyini bir daha təsdiqlədi.”-deyə o paylaşım edib.

Görüşə dair məlumat verən yüksək səviyyəli diplomatik mənbə qeyd edib ki, bu dialoqun aparılmasına ABŞ elçisinin təşəbbüsü ilə şərait yaradılıb.

Qeyd edək ki, görüş Suriya cənubunda – əsasən druzların yaşadığı Süveyda vilayətində 13 iyul tarixində başlayan və bir həftə ərzində 1200-dən çox insanın həlak olduğu qanlı toqquşmalar fonunda təşkil edilib. Silahlı toqquşmalar yerli druzlar və bədəvilər arasında başlasa da, tezliklə hökumət qüvvələri və tayfa silahlıları da bu prosesə qoşulub. Həmin günlərdə İsrailin Dəməşqdəki rəsmi obyektlərə və Süveydədəki hərbi hədəflərə zərbələr endirdiyi bildirilir.

Məlumata əsasən, ABŞ elçisi və Suriya naziri cümə günü Fransanın xarici işlər naziri Jan-Noel Baro ilə də görüş keçirəcəklər.

Xatırladaq ki, 2024-cü ilin dekabrında Bəşşar Əsəd rejiminin devrilməsindən sonra hakimiyyətə gələn Suriya keçid administrasiyası qonşularla münaqişədən uzaq dayanmaq niyyətində olduğunu bəyan etmişdi.

Qeyd olunur ki, bu görüşdən əvvəl – 12 iyul tarixində Azərbaycanın paytaxtı Bakıda Suriya keçid prezidenti Əhməd Şərəin səfəri çərçivəsində suriyalı və israilli rəsmilər arasında daha bir görüş baş tutmuşdu. Bu haqda Dəməşqdəki diplomatik mənbələr məlumat yayıb.