İsrail ordusunun Suriyanın cənubunda yerləşən Kuneytra vilayətinin kənd ərazilərində müvəqqəti nəzarət məntəqəsi quraraq evlərə reydlər keçirdiyi bildirilir. Suriya dövlət televiziyası “Əl-İxbariyyə”nin məlumatına əsasən, İsrail hərbçiləri Kuneytra vilayətinin cənubunda yerləşən Ayn Zivan kəndinin girişində müvəqqəti nəzarət məntəqəsi yaradıblar. Məlumata görə, bölgədə reydlər keçirən hərbçilər yaşayış evlərində axtarış aparıb.

ABŞ-ın Ankaradakı səfiri və Suriyaya xüsusi nümayəndəsi Tom Barak İsrail və Suriya rəsmiləri arasında Fransanın paytaxtı Parisdə keçirilən görüşün nəticələrini “tarixi” adlandırıb. Barak Jerusalem Post qəzetinə verdiyi müsahibədə bildirib ki, görüş hər iki ölkənin əməkdaşlığa və ortaq rifaha doğru irəliləmək istədiyini göstərir. Onun sözlərinə görə, Suriya və İsrail yeni, şəffaf və tərəfdaşlığa əsaslanan münasibət qurmağa hazırdır və bu, Tel-Əvivlə Dəməşq arasında əməkdaşlığı artıracaq.

İsrailin Səna və Yəmənin paytaxtı Cavf şəhərlərinə endirdiyi hava zərbəsi nəticəsində 9 nəfər ölüb, 118 nəfər yaralanıb. Paytaxt Sanada Müdafiə Nazirliyinin qərargahının vurulduğu bildirilir. İsrail ordusu hücumu təsdiqləyib. Yəmənin "Əl-Məsira" televiziya kanalının xəbərində husilərə bağlı silahlı qüvvələrin Sənaya hücum edən İsrail təyyarələrinə qarşı hava hücumundan müdafiə sistemləri ilə mübarizə apardığı bildirilib.

İsrail ordusu Kuneytra vilayətində yerləşən bir qəsəbəyə basqın təşkil edib. İsrail qüvvələri keçirilən əməliyyat zamanı 7 nəfəri həbs edib. Suriya dövlət xəbər agentliyi SANA, İsrail qüvvələrinin Suriyaya basqın təşkil etdiyini və 7 nəfəri saxladığını bildirib. İsrail ordusunun açıqlamasında isə “terror fəaliyyəti şübhəsi” ilə şəxslərin saxlandığı qeyd olunub. İsrail ordusu isə yayımladığı bəyanatda, əsgərlərin “Suriyanın cənub bölgəsində terror fəaliyyəti ilə əlaqəsi olduğundan şübhələnilən bir neçə nəfəri” saxladıqlarını bildirib. Rəsmi şəxslər həbs edilənlərin İsrailə aparılaraq dindirildiyini açıqlayıb.

İsrail Hərbi Hava Qüvvələri Suriyanın cənubuna zərbə endirib. Hücum Colan təpələrinin atəşkəs xəttinin əvvəllər Suriyanın nəzarətində olan tərəfində yerləşən Taranja kəndindəki bir evi hədəf alıb. Nəticədə bir nəfər həlak olub.

Türkiyə Xarici İşlər Nazirliyi bu gün yaydığı bəyanatda İsrailin Suriyaya qarşı həyata keçirdiyi hücumları qətiyyətlə pisləyib. Nazirlik əlavə edib ki, “Türkiyə, Suriya xalqının haqlı gözləntilərinə uyğun olaraq, terrordan təmizlənmiş, təhlükəsizliyi təmin olunmuş və ərazi bütövlüyü qorunmuş bir Suriya vizyonunu dəstəkləməyə davam edəcək.”

İsrail ordusuna məxsus pilotsuz uçuş aparatları (PUA) Suriyanın cənubunda yerləşən Kuneytra vilayətindəki Daxili İşlər Nazirliyinin qərargahına hava hücumu təşkil edib. Hücum nəticəsində yalnız maddi ziyan qeydə alınıb, insan tələfatı yoxdur.

Suriya xarici işlər naziri Əsəd Şeybani və İsrailin strateji məsələlər naziri Ron Dermer Parisdə ABŞ-ın təşəbbüsü ilə görüş keçiriblər. Görüşdə bölgədə gərginliyin azaldılması məqsədi ilə dialoqun davam etdirilməsinə dair razılıq əldə olunub.

İsrailin Suriyadakı hərbi və siyasi addımları, regionda güc balansını dəyişdirmək cəhdi kimi qiymətləndirilsə də, bu strategiyanın uzunmüddətli nəticələri Yaxın Şərqdə yeni bir gərginlik dalğasına səbəb ola bilər.