BAKI, AzerVoice

İran rəsmiləri Beynəlxalq Atom Enerjisi Agentliyi (BAEA) ilə əməkdaşlığı tamamilə dayandırmayıblar, lakin gələcəkdə bu əməkdaşlıq yeni formatda davam etdiriləcək.

AzerVoice xəbər verir ki, bu barədə İranın xarici işlər naziri Seyid Abbas Araqçi açıqlama verib.

“BAEA ilə əməkdaşlığımız dayandırılmayıb, lakin yeni reallıqlar və baş verən hadisələr fonunda bu əməkdaşlıq yeni bir formaya keçəcək” – deyə, Araqçi bildirib.

O vurğulayıb ki, əməkdaşlığın davam etdirilməsi üçün BAEA-nın inspektor fəaliyyəti ilə bağlı tələbləri İranın Ali Milli Təhlükəsizlik Şurası tərəfindən təhlükəsizlik məsələləri nəzərə alınaraq hər bir halda ayrıca qiymətləndiriləcək.

Nazirin sözlərinə görə, İran BAEA əməkdaşlarının ölkədəki nüvə obyektlərində təhlükəsizliyinin təmin olunması məsələsindən də ciddi narahatdır. Belə ki, İsraillə müharibə zamanı atılmış, lakin partlamamış sursatların mövcudluğu bu sahədə təhlükə yaradır.

Xatırladaq ki, 2 iyul tarixində İran Prezidenti Məsud Pezeşkian Tehran ilə BAEA arasında əməkdaşlığın dayandırılmasına dair qanunu imzalayıb. Prezidentin imzasından sonra qanun qüvvəyə minib və icrası məcburi hesab olunur.