BAKI, AzerVoice
İranın xarici işlər naziri Seyid Abbas Araqçi Avropa ölkələrini İsrailin regiondakı siyasətinə qarşı ədalətli mövqe göstərməyə çağırıb.
AzerVoice xəbər verir ki, bu barədə İranın IRNA xəbər agentliyi məlumat verib.
Araqçi bildirib ki, Avropa ölkələri İsrail və ABŞ-ın İrana qarşı həyata keçirdiyi hücumları açıq şəkildə qınamayıb.
“Avropa ölkələri İsrailin bölgədə davam edən təcavüzkar siyasətinə qarşı məsuliyyətli və ədalətli mövqe göstərməlidir” - deyə, Araqçi vurğulayıb.
Nazir əlavə edib ki, İsrail və ABŞ-ın İranın nüvə obyektlərinə qarşı hücumları, Nüvə Silahlarının Yayılmaması haqqında Müqavilə (NPT), BMT Təhlükəsizlik Şurası və Beynəlxalq Atom Enerjisi Agentliyinin (BAEA) qərarlarının açıq şəkildə pozulmasıdır.
"Bu qanunsuz və cinayət xarakterli hərəkətlərin məsuliyyəti təkcə ABŞ və İsrailin deyil, həm də bu hücumları dəstəkləyən digər ölkələrin üzərinə düşür" - deyə, Araqçi bildirib.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.