Bakı. AzerVoice:
Rəfaha hərtərəfli hücum yeni humanitar fəlakətlə nəticələnəcək.
AzerVoice xəbər verir ki, bu barədə Ümumdünya Səhiyyə Təşkilatının (ÜST) işğal olunmuş Fələstin ərazilərindəki nümayəndəsi Riçard Peeperkorn bildirib.
ÜST və digər humanitar yardım tərəfdaşlarının İsrailin Rəfaha hərtərəfli hücumu ehtimalından narahat olduğunu bildirən Peeperkorn, Rəfahda 1,5 milyon insanın olduğunu qeyd edib.
"Qəzzanın hər yerində humanitar yardımların çatdırılmasında gecikmələr və problemlər davam edir. Qəzzada yerli istehsal məhv olub və daxil olan qidaların keyfiyyəti olduqca aşağıdır. Qəzzada ərzaq böhranının təsirləri növbəti illərdə də özünü göstərəcək", - deyə o vurğulayıb.
Qeyd edək ki, Qəzzanın Səhiyyə Nazirliyi bildirir ki, Qəzzada 34 mindən çox fələstinli öldürülüb və 2,3 milyon əhalisinin əksəriyyəti evlərini tərk etmək məcburiyyətində qalıb.
Nazirlik öz sayında mülki şəxslər və döyüşçülər arasında fərq qoymur, lakin qadınların və uşaqların ölənlərin üçdə ikisini təşkil etdiyini bildirir.
İsrail dinc sakinlərin ölməsində HƏMAS-ı günahlandırır, çünki yaraqlılar sıx yaşayış məntəqələrində döyüşürlər.
İsrail heç bir sübüt təqdim etmədən 13 min HƏMAS döyüşçüsü öldürdüyünü bildirib.
Bu arada Qəzzada döyüşlər davam edir. İsrailin Qəzzanın cənubunda BMT-nin fələstinli qaçqınlarla işləyən agentliyi olan UNRWA-nın qida paylama məntəqəsinə endirdiyi zərbə nəticəsində agentliyin bir əməkdaşı həlak olub, 22 nəfər yaralanıb.
UNRWA-nın məlumatına görə, son beş ayda gedən döyüşlər zamanı agentliyin həlak olan işçilərinin sayı 165-ə çatdırıb.
Qəzzanın səhiyyə orqanları UNRWA anbarının həyətinə endirilən zərbə nəticəsində ümumilikdə 5 nəfərin öldüyünü bildirib.