Bakı. AzerVoice:
Qəzzada aclıq təhlükəsi qorxulu səviyyədədir.
AzerVoice xəbər verir ki, bu barədə Türkiyənin Birləşmiş Millətlər Təşkilatındakı (BMT) daimi nümayəndəsi, səfir Sedat Önal bildirib.
"İsrail-Qəzza münaqişəsinin beşinci ayında, BMT Təhlükəsizlik Şurası hələ də bu fəlakətin qarşısını ala bilməyib. Beynəlxalq ictimaiyyətin bütün xəbərdarlıqlarına baxmayaraq, Qəzzanın cənubunda yeni fəlakət başlayır", - deyə o qeyd edib.
Türkiyənin BMT-dəki nümayəndəsi onu da vurğulayıb ki, Türkiyə sülhə, iqlim dəyişikliyi ilə mübarizəyə və ərzaq təhlükəsizliyinin aradan qaldırılmasına yönəlmiş bütün beynəlxalq səyləri dəstəkləməyə davam edəcək.
Qeyd edək ki, oktyabrın 7-də İsrailə hücumlar olunub. Əvvəlcə Qəzza bölgəsindən reaktiv mərmilərlə kütləvi atəş açılıb, daha sonra döyüşçülər əraziyə qurudan, havadan və sudan daxil olublar.
İsrail müharibə vəziyyəti elan edib. Bundan başqa, İsrailin müdafiə naziri Yoav Qallant ehtiyatda olan hərbçilərin kütləvi çağırışını elan edib.
Oktyabrın 7-də İsrail-Fələstin münaqişəsinin yeni mərhələsi başlayandan bəri Qəzza zolağında ölənlərin sayı 28 min 340 nəfərə çatıb.