BAKI, AzerVoice

Qəzzada Qəssam Briqadalarının pusqusunda 5 İsrail əsgəri ölüb, 14-ü yaralanıb.

AzerVoice xəbər verir ki, İsrail ordusu Qəzza zolağının şimalındakı Beyt Hanun bölgəsində HƏMAS-ın silahlı qanadı İzzəddin əl-Qəssam Briqadaları ilə baş verən silahlı qarşıdurma zamanı 5 əsgərin öldüyünü, 14-nün isə yaralandığını açıqlayıb.

İsrail Ordusu Radiosunun məlumatına görə, piyadalar əvvəlcədən yola yerləşdirilmiş bombalarla hədəfə alınıb. Yaralıların təxliyəsi üçün göndərilən əlavə bölmələr də hücuma məruz qalıb.

Ölənlərdən dördü – Moşe Nissim Freç, Meir Şimon Amar, Noam Aharon Musqadiyan və baş serjant Moşe Şmuel Noll – Kfir briqadasının Netzah Yehuda batalyonunun, digəri isə Şimal briqadasının üzvüdür – Benyamin Asulin.

İzzəddin əl-Qəssam Briqadaları hücumla bağlı açıqlamasında “Ordunuzun reputasiyasını məhv edəcəyik” mesajını verib və mübarizənin davam edəcəyini bəyan edib.

Qeyd edək ki, 1991-ci ildə yaradılan Qəssam Briqadaları HƏMAS-ın hərbi qanadıdır və İsrailə qarşı tunel əməliyyatları, raket hücumları və pusqularla tanınır. Onlar ABŞ və Aİ tərəfindən terror təşkilatı kimi, bəzi müsəlman ölkələri tərəfindən isə “müqavimət hərəkatı” kimi tanınır.

Qəzzada 2023-cü ilin oktyabrından bu yana İsrail ordusunun itkiləri 888-ə yüksəlib.