BAKI, AzerVoice
Türkiyə müdafiə sənayesindəki uğur modelini səhiyyə və kənd təsərrüfatı sektorlarına da yaymağı planlaşdırır.
AzerVoice xəbər verir ki, Türkiyə Böyük Millət Məclisinin Xarici Əlaqələr Komitəsinin sədri və AK Partiyanın Ankara millət vəkili Fuat Oktay, Türkiyənin müdafiə sənayesində əldə etdiyi texnoloji irəliləyişi səhiyyə və kənd təsərrüfatı başda olmaqla digər strateji sahələrə də yaymaq niyyətində olduğunu bildirib.
Londonda keçirilən Texnologiya Həftəsi çərçivəsində Türkiyə səfirliyində təşkil olunan qəbulda çıxış edən Oktay qeyd edib ki, Türkiyə artıq texnologiya ixrac edən və Avropa ilə yanaşı, İngiltərə kimi əsas ticarət tərəfdaşlarına ixracatını artıran bir ölkəyə çevrilib.
“Yüksək əlavə dəyərli məhsulların istehsalı və ixracı vasitəsilə güclənmək mümkündür. Müdafiə sənayesi bu sahədə uğurlu nümunədir. Bu sürəti indi səhiyyə, kənd təsərrüfatı və enerji sektorlarına da tətbiq etməyi hədəfləyirik,” – deyə Fuat Oktay vurğulayıb.
Oktay bildirib ki, müdafiə sahəsində formalaşan ekosistem prezidentin liderliyi və dövlət-özəl sektor əməkdaşlığı ilə həyata keçirilmiş uğurlu modeldir və bu model digər sahələrə də transfer edilə bilər. Xüsusilə səhiyyədə tibbi cihazlar, peyvənd və dərman texnologiyalarının inkişafında bu yanaşma tətbiq olunacaq.
“Bu uğurlar yalnız sektor daxili deyil, həm də Türkiyənin büdcə kəsirinin azaldılmasına xidmət edəcək,” – deyə o əlavə edib.
Fuat Oktay kənd təsərrüfatının da müdafiə sənayesi qədər strateji əhəmiyyət daşımağa başladığını və bu sahədə texnoloji startaplara böyük ehtiyac olduğunu vurğulayıb. Məqsədin yeni nəsil texnoloji təşəbbüslərlə Turcorn (texnoloji unicorn) şirkətlərini artırmaq olduğunu bildirib.
O, həmçinin bürokratik maneələrin azaldılması və beynəlxalq tərəfdaşlıqların genişləndirilməsi ilə texnologiya ekosistemini gücləndirməyə çalışdıqlarını açıqlayıb.
Londonda keçirilən tədbirlər çərçivəsində viza problemlərinin də gündəmdə olduğunu qeyd edən Oktay, bu mövzuya yalnız hökumətlərarası deyil, vətəndaş cəmiyyəti səviyyəsində də həll yollarının axtarıldığını bildirib.
Türkiyənin Londondakı səfiri Osman Koray Ertaş da London Texnologiya Həftəsi çərçivəsində çıxış edərək qeyd edib ki, dünyada texnologiya sahəsində ciddi dönüş nöqtəsi yaşanır və bu yarışda geridə qalan ölkələrin texnoloji inkişafdan kənarda qalmaq riski var.
“Türkiyə texnoparkları və dövlət dəstəyi ilə güclü başlanğıc edib. London Texnologiya Həftəsində 100-dən çox türk nümayəndəsi texnologiya nəhəngləri ilə bir araya gəlib. Məqsəd Turcorn sayını artırmaq və qlobal bazarlara çıxışı genişləndirməkdir,” – deyə Ertaş bildirib.