BAKI, AzerVoice
İsrailin Müdafiə Naziri İsrael Katz, hərbçilərə "Azadlıq Donanması"na aid "Madlin" gəmisinin Qəzza Zolağına çatmasına icazə verməməyi tapşırıb.
AzerVoice xəbər verir ki, bu barədə Katzın verdiyi açıqlamada deyilir.
Gəmi 1 iyun tarixində, Qəzza Zolağına humanitar yardım daşımaq üçün Siciliya adasından yola çıxıb. Gəmiyə 12 fələstin tərəfdarı aktivist, o cümlədən ekoloji fəal Qreta Tunberq minmişdi.
"Yəhudi əleyhdarı Qreta və onun HƏMAS təbliğatçıları olan dostlarına açıq deyirəm: Geri qayıtmalısınız, çünki siz Qəzzaya çatmayacaqsınız" - deyə, Katz qeyd edib.
Onun sözlərinə görə, İsrail, Qəzza Zolağının blokadasını dənizdə, havada və quruda pozmağa cəhd edən hər hansı bir təşəbbüsü dayandıracaq.
Hal-hazırda "Madlin" gəmisinin Misir sularında olduğu bildirilir.
Xatırladaq ki, keçən ay, Malta sahillərində "Azadlıq Donanması"nın bir gəmisinə dron hücumu olmuşdu.
Məlumat üçün bildirək ki, "Azadlıq Donanması" Qəzza Zolağının işğalını aşmaq məqsədilə yaradılıb.