Bakı. AzerPress:
Zəngəzur Dəhlizi ticari, logistik və siyasi əlaqələrinin gücləndirilməsi baxımından çox əhəmiyyətlidir.
AzerPress-in məlumatına görə, bu barədə Türkiyə nəqliyyat və infrastruktur naziri Abdulkadir Uraloğlu deyib.
“Qonşu ölkələr və türk dünyası ilə əlaqələrimizi tarixi zirvələrə çatdırmağa davam edirik. Biz qlobal miqyasda mühüm nəqliyyat layihələrini, xüsusən də ixracı artırmaq və alternativ bazarlar yaratmaq üçün gündəmimizə saldıq və maraqlı tərəflərlə birlikdə lazımi addımları atmağa başladıq.” – deyə Uraloğlu bildirib.
O xatırladıb ki, ötən il Nəqliyyat və İnfrastruktur naziri kimi Əlcəzairdən Özbəkistana, İraqdan Qazaxıstana, Şimali Kipr Türk Respublikasından Azərbaycana qədər çoxlu beynəlxalq əlaqələr qurub.
“Türkiyə olaraq həyata keçirdiyimiz İnkişaf Yolu və Zəngəzur Dəhlizi layihələri ölkəmizin ticari, logistik və siyasi əlaqələrinin gücləndirilməsi baxımından çox əhəmiyyətlidir. Hər iki layihə ölkəmizi xüsusilə Rusiya-Ukrayna müharibəsi başlayandan bəri Avropanın yeni tərəfdaşlar axtardığı bir vaxtda regional münasibətlərin mərkəzində yer alacaq.
Uraloğlu Türkiyə ilə Azərbaycan arasında birbaşa dəmir yolu və avtomobil nəqliyyatını təmin edəcək Zəngəzur Dəhlizi layihəsini də həyata keçirəcəklərini ifadə edib və layihədəki mövcud vəziyyət haqqında məlumat verib.
Hafiz Rufizoğlu