BAKI,VOA,Yusif Şərifzadə

İranın cənubunda yerləşən strateji Sirik limanına endirilən hərbi zərbə nəticəsində 4 nəfər yaralanıb, dəniz infrastrukturu isə ciddi zədələnib.

VOA xəbər verir ki, bu barədə İranın rəsmi xəbər agentliyi məlumat yayıb. Bildirilib ki, hücum Hörmüz boğazı bölgəsində gecə saatlarında baş verən daha geniş hərbi gərginliyin bir hissəsi olub.

Məlumata görə, Sirik limanına hücum liman hövzəsi daxilində iki dalğa şəklində həyata keçirilib. Zərbələr nəticəsində limanın əsas üzən körpülərindən biri ciddi zədələnib. Yerli kommersiya gəmilərinə və yaxınlıqdakı rabitə qüllələrinə də ziyan dəydiyi bildirilir.

Şərqi Hörmüzqan vilayətinin limanlar və dəniz işləri üzrə rəsmisi Həmidrza Məhəmmədhüseyni Təxti bildirib ki, yaralılardan birinin vəziyyəti ağırdır və o, Minab şəhərindəki xəstəxanaya aparılıb. Daha 3 nəfərə isə hadisə yerində ilkin tibbi yardım göstərilib.

İran mediasının məlumatına görə, insident ABŞ Mərkəzi Komandanlığının Hörmüzqan vilayətində, o cümlədən Bəndər Abbas və Qeşm adasında bir sıra hədəflərə qarşı gecə əməliyyatları barədə xəbərlərdən sonra baş verib.

Sirik limanında fəaliyyətin pozulduğu bildirilir. Bununla yanaşı, Cask və Tiab limanları kimi qonşu dəniz nəqliyyatı mərkəzlərinin gücləndirilmiş təhlükəsizlik tədbirləri altında fəaliyyətini davam etdirdiyi qeyd olunur.