BAKI,VOA,Yusif Şərifzadə

İran Bəhreyndə ABŞ-nin rəhbərliyi ilə keçirilən regional təhlükəsizlik toplantısını sərt tənqid edib. Tehran bu cür görüşlərin bölgədə sülh və sabitliyə xidmət etmədiyini bildirib.

VOA xəbər verir ki, Bəhreyndə Yaxın Şərqin 12 ölkəsinin yüksəksəviyyəli hərbi nümayəndələri ABŞ Mərkəzi Komandanlığının iştirakı ilə regional müdafiə əməkdaşlığı və dəniz təhlükəsizliyini müzakirə ediblər. İran Xarici İşlər Nazirliyinin sözçüsü İsmayıl Bəqayi isə bu toplantını "yalnız görüntü xarakteri daşıyan siyasi nümayiş" adlandırıb.

İsmayıl Bəqai bildirib ki, ABŞ Yaxın Şərqdə həqiqi sülh və təhlükəsizliyə hörmət etmədiyini dəfələrlə nümayiş etdirib. Onun sözlərinə görə, belə görüşlər Vaşinqtonun bölgədə həyata keçirdiyi siyasəti gizlətmək məqsədi daşıyır.

İran rəsmisi ABŞ-ni bölgədə sabitliyi pozan siyasət yürütməkdə ittiham edib. O, region ölkələrini ABŞ və İsrailin son hərbi əməliyyatlarından nəticə çıxarmağa və ayıq-sayıq olmağa çağırıb.

Bəyanat Bəhreyndə keçirilən təhlükəsizlik toplantısından dərhal sonra səsləndirilib. Toplantıda regional müdafiə əməkdaşlığının gücləndirilməsi və dəniz yollarının təhlükəsizliyinin təmin olunması məsələləri müzakirə olunub.