BAKI,VOA, Fərid Mikayılov

Dünya çempionatı ərəfəsində İran tərəfi beynəlxalq futbol qurumuna müraciət edib.

VOA xəbər verir ki, İran Futbol Federasiyasının prezidenti Mehdi Taj FIFA-dan ölkə millisinin yarış zamanı təhqirə məruz qalmayacağına dair rəsmi təminat istəyib.

O bildirib ki, İran nümayəndə heyətinin səfəri zamanı dövlət simvollarına, xüsusilə İslam İnqilabı Keşikçiləri Korpusu ilə bağlı hər hansı təhqiredici münasibətə yol verilməməlidir.

Taj qeyd edib ki, İran millisi dünya çempionatına vəsiqə qazanıb və turnirin təşkilatçısı FIFA olduğuna görə bütün iştirakçılar üçün bərabər və hörmətli şərait təmin edilməlidir.

Məlumata görə, bu tələb İran nümayəndə heyətinin Kanadaya səfəri zamanı yaşanan insidentdən sonra səsləndirilib. Bildirilir ki, Tajın vizası uçuş zamanı ləğv edilib və bu, İran tərəfi tərəfindən hörmətsiz yanaşma kimi qiymətləndirilib.

Qeyd edək ki, ABŞ və Kanada İslam İnqilabı Keşikçiləri Korpusunu terror təşkilatı kimi tanıyır. 2026-cı il dünya çempionatı isə ABŞ, Kanada və Meksikanın birgə təşkilatçılığı ilə keçiriləcək.