BAKI,VOA, Orxan Qədirzadə

ABŞ və İran arasında əldə olunmuş müvəqqəti atəşkəs razılaşmasından bir neçə saat sonra Hörmüz boğazında gəmilərin hərəkəti bərpa edilib.

VOA "Marine Traffic" portalının naviqasiya məlumatlarına əsasən xəbər verir ki, şərti atəşkəs elan edildikdən sonra strateji boğazı keçən ilk gəmi Liberiya bayrağı altında üzən "Dayton Beach" yük gəmisi olub. İranın Bəndər-Abbas limanındakı gözləmə zonasını tərk edən gəmi, Hörmüz boğazından keçərək Birləşmiş Ərəb Əmirliyinin Əl-Füceyrə limanına doğru istiqamət alıb.

Aparılan araşdırmalar göstərir ki, sözügedən gəmi Yunanıstan mərkəzli bir şirkət tərəfindən idarə olunur. Qeydiyyat nömrəsi 9615054 olan gəmi, ABŞ və İsrailin İrana qarşı başlatdığı hərbi əməliyyatların ilk günlərindən bəri hərəkətsiz qalıbmış. Məlumata görə, fevralın 19-da Bəhreynin Sitra limanına daxil olan gəmi, daha sonra İranın Bəndər-Abbas limanında lövbər salaraq müharibənin sonuna qədər orada gözləməli olub.

Xatırladaq ki, hərbi əməliyyatların gərginləşdiyi dövrdə rəsmi Tehran Hörmüz boğazında naviqasiyaya sərt məhdudiyyətlər tətbiq etmişdi. Təkcə aprelin 4-dən 6-na qədər olan müddətdə boğazdan cəmi 29 gəminin keçidi qeydə alınmışdı ki, bu da normal hərəkət intensivliyi ilə müqayisədə kəskin azalma demək idi. Hazırda hərəkətin bərpası müəyyən edilmiş marşrutlara riayət olunması, əvvəlcədən koordinasiya və təhlükəsizlik şərtlərinə əməl edilməsi çərçivəsində mümkündür.

Müharibənin 40-cı günündə ABŞ Prezidenti Donald Tramp tərəflər arasında iki həftəlik atəşkəs barədə razılığın əldə olunduğunu təsdiqləyib. Prezident bu razılaşmanı ABŞ-ın "tam və qəti qələbəsi" kimi qiymətləndirib. Atəşkəs şərtlərinə görə, İran Hörmüz boğazını dərhal və tam şəkildə təhlükəsiz naviqasiya üçün açmalı, qarşılığında isə ABŞ bombalamaları dayandırmalıdır.