BAKI,VOA

İranın energetika naziri Abbas Əliabadi ölkədəki bütün strateji və həssas mərkəzlərin elektrik enerjisi ilə təminatının hazırda tam nəzarət altında olduğunu bəyan edib.

VOA xəbər verir ki, nazir Əliabadi rəsmi açıqlamasında qeyd edib ki, ölkənin enerji infrastrukturu hər hansı bir böhran və ya gərginlik şəraitində fasiləsiz işləmək gücündədir. O, həmçinin iddia edib ki, İranın daxili tələbatından daha çox — "artıq" elektrik enerjisi istehsal etmək imkanları mövcuddur.

Nazirin bu bəyanatı ABŞ Prezidenti Donald Trampın İranın elektrik stansiyalarını və infrastrukturunu hədəf alacağı ilə bağlı verdiyi sərt xəbərdarlıqlardan sonraya təsadüf edir. Əliabadi bu açıqlaması ilə daxili auditoriyaya və beynəlxalq birliyə İranın enerji sisteminin hərbi zərbələr qarşısında dayanıqlı olduğu və mühüm dövlət müəssisələrinin (xəstəxanalar, hərbi qərargahlar, rabitə mərkəzləri) enerji ilə təchizatında heç bir problemin yaşanmayacağı mesajını verməyə çalışır.

Ekspertlər isə qeyd edirlər ki, "artıq enerji" barədə bəyanatlar psixoloji müharibənin tərkib hissəsi ola bilər, çünki mümkün hava zərbələri şəraitində vahid enerji sisteminin (grid) bütövlüyünü qorumaq olduqca çətindir.