BAKI,VOA, Nailə Babazadə

Beynəlxalq Atom Enerjisi Agentliyi (MAQATE) bazar günü yaydığı bəyanatda İsrailin hərbi hava zərbələrindən sonra İranın Xondab bölgəsində yerləşən ağır su istehsalı zavodunun artıq istismara yararlı olmadığını bildirib.

VOA xəbər verir ki, agentlik peyk görüntülərinin müstəqil təhlilinə əsaslanaraq, 27 mart tarixində hücuma məruz qalan müəssisəyə "ciddi ziyan dəydiyini" təsdiqləyib.

İsrail hərbçiləri cümə günü mərkəzi İrandakı Ərak yaxınlığında yerləşən zavoda zərbə endirdiklərini etiraf edərək, həmin obyekti "nüvə silahı üçün əsas plutonium istehsalı mərkəzi" kimi xarakterizə ediblər. MAQATE isə öz növbəsində qeyd edib ki, hücuma məruz qalan qurğuda bəyan edilmiş hər hansı nüvə materialı mövcud deyil.

Regionda müharibənin başlamasından bəri keçən bir ay ərzində İranın müxtəlif bölgələrində yerləşən bir neçə nüvə obyekti dəfələrlə hərbi zərbələrin hədəfi olub. Xondab zavodunun sıradan çıxması İranın nüvə proqramının texniki imkanlarına vurulan ən böyük zərbələrdən biri kimi qiymətləndirilir.