BAKI,VOA

ABŞ Prezident Donald Tramp administrasiyası amerikalı diplomatlara müttəfiq ölkələrə təzyiq göstərmək barədə göstəriş verib. Vaşinqton müttəfiqlərindən İran İslam İnqilabı Keşikçiləri Korpusu (SEPAH) və Livanın "Hizbullah" qruplaşmasını terror təşkilatları siyahısına salmağı tələb edir.

VOA xəbər verir ki, Martın 16-da imzalanan və ABŞ Dövlət katibi Marko Rubionun imzasını daşıyan bu sənəd Amerikanın dünya üzrə bütün diplomatik missiya və konsulluqlarına göndərilib. Sənəddə hücum risklərinin artdığı vurğulanır və diplomatlardan bu mesajı ən gəzi martın 20-nə qədər müttəfiq ölkələrin yüksək səviyyəli rəsmilərinə çatdırmaq tələb olunur.

İsrail ilə koordinasiyalı fəaliyyət

Xüsusi olaraq qeyd edilir ki, SEPAH və "Hizbullah"ın "qara siyahı"ya salınması istiqamətində amerikalı diplomatların göstərdiyi səylər İsrail tərəfi ilə sıx koordinasiya şəraitində həyata keçirilməlidir. Bu addım Vaşinqtonun regional təhlükəsizlik strategiyasının tərkib hissəsi kimi qiymətləndirilir.

Administrasiya hesab edir ki, bu qruplaşmaların beynəlxalq səviyyədə terror təşkilatı kimi tanınması onların maliyyə qaynaqlarını kəsmək və hərbi hərəkətliliyini məhdudlaşdırmaq üçün zəruridir.