BAKI, AzerVoice

İnsan orqanizmi ətraf mühitdə baş verən temperatur dəyişikliklərinə baxmayaraq daxili temperaturunu sabit saxlamaq qabiliyyətinə malikdir. Mütəxəssislər bildirirlər ki, bu proses homeostaz adlanan və orqanizmin özünü tənzimləməsinə əsaslanan bir mexanizmdir.

İnsan bədəni üçün ideal temperatur 37 dərəcə Selsi (98.6 Fahrenheit) hesab olunur. Lakin ətraf mühitin təsiri, hormon səviyyələri, fərdi metabolizm və xəstəliklər bu göstəricinin yüksəlməsinə və ya enməsinə səbəb ola bilər.

Bədən temperaturunun tənzimlənməsində əsas rol beynin hipotalamus adlı bölgəsinə məxsusdur. Temperaturla bağlı məlumatlar sinir və qan dövranı sistemləri vasitəsilə toplanaraq beyinə ötürülür. Beyin bu məlumatlara əsasən nəfəsalma sürətini, qan şəkəri səviyyəsini və metabolik aktivliyi tənzimləyir.

İstiliyi azaltmaq üçün bədən tərləmə, əzələ aktivliyinin azalması və qan axınının dəriyə yaxın sahələrə yönləndirilməsi kimi mexanizmlər işə salır. İstilik itkisini azaltmaq üçün isə qan axını dəridən uzaqlaşdırılır, piy təbəqəsi və xarici amillər (geyim, sığınacaq və s.) qoruyucu rol oynayır.

Soyuq hava şəraitində bədən titrəmə (əsmə) yolu ilə əlavə istilik yaratmağa çalışır.