BAKI, VOA, Orxan Qədirzadə

1999-cu ilin 24 mart tarixində NATO qüvvələri Yuqoslaviya Federativ Respublikasına qarşı genişmiqyaslı hava əməliyyatlarına başlayıb. 10 iyun tarixinədək davam edən bu müharibə Avropanın mərkəzində hərbi-siyasi balansın köklü şəkildə dəyişməsi və Kosovonun faktiki olaraq Serbiyadan ayrılması ilə nəticələnib.

Əməliyyatın başlanmasına əsas səbəb kimi Kosovo və Metoxiyada etnik albanlara qarşı aparılan təqiblər və serb qüvvələrinin NATO-nun ultimatumunu rədd etməsi göstərilib. 78 gün davam edən bombardmanlar nəticəsində Yuqoslaviyanın hərbi və mülki infrastrukturu ağır zərbələr alıb.

NATO-nun baş katibi Xavyer Solananın əmri ilə başlayan hücumlar zamanı 500-dən çox hərbi təyyarə prosesə cəlb edilib. Belqrad, Priştina, Novi-Sad və Niş kimi iri sənaye mərkəzləri şiddətli raket və bomba zərbələrinə məruz qalıb.

27 mart: ABŞ-ın "görünməz" hesab edilən "F-117 Nighthawk" təyyarəsi serb qüvvələri tərəfindən vurulub.

7 may: NATO raketləri səhvən Çinin Belqraddakı səfirliyinə düşüb, bu da beynəlxalq qalmaqala səbəb olub.

10 iyun: BMT Təhlükəsizlik Şurasının 1244 saylı qətnaməsi qəbul edilib və serb qoşunları Kosovodan çıxarılıb.