BAKI,AzerVoice
1459-cu ildə Cenevizlilərin əlində olan Amasra fəth edildi. 1461-ci ildə Osmanlı orduları Qara dəniz yürüşünə çıxdılar. Bu yürüş nəticəsində Qara dənizin qərbində yerləşən Candaroğulları bəyliyi ilə Trabzon Rum imperiyası ləğv olundu.
Osmanlının əzəli düşməni olan Karamanoğulları bəyliyindəki taxt mübarizəsi, Ağqoyunlularla Osmanlıları üz-üzə gətirdi. Ağqoyunlularların hadisəyə qarışması və Pir Əhməd bəyin Fatehdən kömək istəməsi ilə Osmanlı imperiyası da vəziyyətə müdaxilə etdi.
Osmanlı qüvvələri qarşısında məğlub olan İshaq bəy, himayədarı Uzun Həsənin yanına qaçdı. Onun Osmanlılara təklif etdiyi iki şəhər və Sıklan qalası ilə Ilgın qalası istisna olmaqla, qalan bütün torpaqlar Pir Əhmədə verildi.
Osmanlı dəstəyi ilə qısa müddətdə qardaşı İshaq bəyi məğlub edən Pir Əhməd, Karamanoğullarının bəyi oldu. Bu, Fateh Sultan Mehmedin Karamanoğullarından birinə Karamanı son dəfə bəylik kimi verməsi idi.
Lakin çox keçmədən Pir Əhməd də digər Karaman bəyləri kimi Osmanlı dövlətinə qarşı fəaliyyət göstərməyə başladı və Fatehə itaətdən çıxdı. Karamanoğullarının sönməyən müstəqillik ruhu Pir Əhməddə yenidən üzə çıxdıqda, Fateh Sultan Mehmed onu hakimiyyətdən uzaqlaşdırmaq və Karamanı Anadoludakı türk torpaqlarından biri kimi bir sancaq halına gətirmək qərarına gəldi.
Pir Əhmədin üsyanı və Fatehin Anadolu yürüşü
Venesiya məsələsinə görə Fateh bir müddət Pir Əhmədin 1463-cü ildəki üsyanına göz yumdu. Daha sonra Fateh Sultan Mehmed 1465-ci ilin payızında Anadoluya keçdi. Pir Əhməd qaçaraq özünü Larendə (indiki Karaman) şəhərinə sığındı.
Vəziri-əzəm Mahmud paşa, çətin mübarizədən sonra Pir Əhmədi son sığındığı yerdən də qaçmağa məcbur etdi. Bunun ardınca Pir Əhməd Varsak və Turgut kimi türkmən tayfalarının yaşadığı Toros dağlarına sığındı.
Fatehin başçılıq etdiyi Osmanlı ordusu Konya başda olmaqla bəyliyin əhəmiyyətli hissəsini fəth etdi. Fateh Sultan Mehmedin böyük oğlu Şahzadə Mustafa Konya sancaqbəyi təyin edildi. Noyabr ayında yürüş başa çatdıqdan sonra Fateh Sultan Mehmed İstanbula geri döndü.
Uzun Həsənin yüksəlişi və Karamanın sonu
1467-ci ildə Uzun Həsən Mavəraünnəhrin böyük hökmdarı Əbu Səid xana qarşı mühüm bir qələbə qazandı. Əbu Səid xan öldürüldü. Bu qələbədən sonra Uzun Həsənin mövqeyi dəyişdi və o, himayəsində olan Karamanoğullarının haqqını qorumaq üçün hərəkətə keçdi.
Karamanoğlu Pir Əhməd, Karaman bəyliyinin torpaqlarına qayıtdı və keçmiş vəziri-əzəm Rum Mehmed paşa ilə döyüşdü. Karaman türkmənləri öz bəylərinin yanında döyüşməyə başladığı üçün bölgədəki Osmanlı qüvvələri Pir Əhmədə qarşı uğur qazana bilmədilər.
Bunun üzərinə Bosna sancaqbəyi İshaq bəy Anadoluya çağırıldı. Qısa müddət sonra İshaq bəy Pir Əhmədi və onun müttəfiqi olan qardaşı Qasımı məğlub etdi. Karaman hökmdarlarının yeni paytaxtı Aksaray da Konyanın taleyini paylaşdı.
Karamanoğullarının tam tənəzzülü
Daha sonra Gedik Əhməd paşanın komandanlıq etdiyi Osmanlı ordusu Alanyanı, son Karaman bəyi Kılıç Arslanın əlindən aldı. Kılıç Arslan Avropaya qaçdı.
1474-cü ildə Gedik Əhməd paşa Anadolu qüvvələri ilə Ərmənəki, Pir Əhmədin ailəsinin saxlandığı Minanı və son olaraq Silifkeni fəth etdi. Şehzadə Mustafa isə Develi qalasını aldı.
Lakin Toros dağlarında yaşayan türkmən tayfaları üzərində tam nəzarət qurmaq mümkün olmadığından, bu bölgədə müharibə illərlə davam etdi.