BAKI, AzerVoice

İsrail Qəzzada hər gün 100 mülki vətəndaşı öldürür.

AzerVoice xəbər verir ki, Fələstinin BMT-dəki daimi nümayəndəsinin müavini Məcid Bamiye BMT Təhlükəsizlik Şurasının iclasında çıxış edərək İsrailin Qəzza zolağında hər gün orta hesabla 100 dinc sakini öldürdüyünü bəyan edib.

O, İsrailin aclığı müharibə silahına çevirdiyini və bölgədə humanitar fəlakətə səbəb olduğunu bildirib.

Bamiye çıxışında İsrailin Qəzzada mülki infrastrukturu – evləri, xəstəxanaları və yardım obyektlərini hədəfə aldığını qeyd edib. Onun sözlərinə görə, fələstinlilər bölgənin cəmi 16%-lik hissəsində yaşamağa məcbur edilir, bu isə Qəzzanı dünyanın ən sıx məskunlaşmış ərazisinə çevirib.

Diplomat əlavə edib ki, fələstinlilər öz torpaqlarını tərk etməyə məcbur edilir, beynəlxalq hüquq isə bu cür zorakılıqları pisləyir. O, çıxışında qeyd edib ki, məsul şəxslər beynəlxalq hüquq qarşısında cavab verməlidir və problemin yeganə həlli yolu paytaxtı Şərqi Qüds olan müstəqil Fələstin dövlətinin qurulmasıdır.

Qeyd edək ki, Fələstin rəsmilərinin verdiyi məlumata əsasən, İsrailin 2023-cü il oktyabrın 7-dən indiyə qədərki hücumları nəticəsində Qəzzada azı 56 531 fələstinli həyatını itirib, 133 642 nəfər isə yaralanıb.