BAKI, AzerVoice

HƏMAS, ABŞ Prezidenti Donald Trampın xüsusi nümayəndəsi Stiven Uitkoffla Qəzza zolağı ilə bağlı razılığa gəlib.

AzerVoice xəbər verir ki, bu barədə HƏMAS-ın verdiyi açıqlamada deyilir.

Bildirilib ki, bu razılaşma çərçivəsində HƏMAS 10 israilli girovu azad etməyə və bir neçə həlak olmuş şəxsin cəsədini təhvil verməyə hazırdır.

"HƏMAS və Uitkoff ümumi razılaşma çərçivəsində Qəzzada daimi atəşkəsin əldə edilməsi, İsrail ordusunun ərazidən çıxarılması və humanitar yardımın bərpası məsələlərində razılığa gəliblər. Əldə olunan razılaşma 10 israilli girovun azad olunmasını və bir neçə həlak olmuş israilli əsirin cəsədinin qarşı tərəfə təhvil verilməsini, əvəzində razılaşdırılmış sayda fələstinli məhbusun azad olunmasını nəzərdə tutur" - deyə, açıqlamda qeyd olunub.

HƏMAS hələlik neçə nəfərin cəsədinin təhvil veriləcəyini açıqlamayıb və hazırda qarşı tərəfin yekun cavabını gözləyir.

HƏMAS həmçinin bildirib ki, razılaşmadan sonra Qəzza zolağının idarəsinin müvəqqəti komitəyə verilməsinə də hazırdır.

Qeyd edək ki, Misirin "Əl-Qahirə əl-İxbariyyə" telekanalının məlumatına görə, Qəzzaya dair danışıqlar hələ də davam edir və yaxın zamanda atəşkəs razılaşmasına nail olunması üçün məsləhətləşmələr aparılır.