BAKI, AzerVoice

İsrail Silahlı Qüvvələri Qəzza zolağının cənubunda, Xan Yunis şəhəri yaxınlığındakı Əl-Məvasi bölgəsinə hava zərbəsi endirib.

AzerVoice xəbər verir ki, bu barədə "Al Jazeera" telekanalı məlumat yayıb.

Məlumata görə, hava zərbəsi nəticəsində azı beş nəfər ölüb, 10 nəfər yaralanıb. Zərbə məcburi köçkünlərin yerləşdiyi çadırlara endirilib. Həlak olanlar arasında iki uşağın da olduğu bildirilib.

Qeyd edək ki, Yaxın Şərqdə vəziyyət 2023-cü il oktyabrın 7-də HƏMAS-ın silahlı üzvlərinin Qəzza zolağından İsrail ərazisinə daxil olaraq, sərhəd yaşayış məntəqələrində mülki şəxsləri öldürməsi və girov götürməsi ilə kəskin şəkildə gərginləşib. Buna cavab olaraq İsrail Qəzzada HƏMAS-ın hərbi və siyasi infrastrukturunu məhv etmək və bütün girovları azad etmək məqsədilə hərbi əməliyyata başlayıb.

Martın 18-də İsrail ordusu atəşkəs rejimini pozaraq Qəzza zolağında hərbi əməliyyatları bərpa edib və bölgəyə genişmiqyaslı zərbələr endirib. İsrailin höküməti əməliyyatın yenidən başlanmasını HƏMAS-ın ABŞ prezidentinin xüsusi elçisi Stiven Uitkoff və vasitəçilər tərəfindən təqdim edilən təklifləri qəbul etməməsi ilə əsaslandırıb. Qəzzadakı əməliyyatın məqsədinin bütün girovların azad edilməsi olduğu bildirilib. HƏMAS isə döyüşlərin yenidən başlanmasında məsuliyyəti İsrail və ABŞ-ın üzərinə qoyub.