BAKI, AzerVoice

Azərbaycan böyük siyasi çağırışlara baxmayaraq iqtisadi artımı təmin edib.

AzerVoice xəbər verir ki, bu barədə Bakıda keçirilən II Azərbaycan–Türkiyə İnvestisiya Forumunda çıxış edən Türkiyə Respublikasının vitse-prezidenti Cevdet Yılmaz bildirib.

Onun sözlərinə görə, Azərbaycan üzləşdiyi ciddi siyasi problemlərə və işğal altında olan ərazilərini azad etmək üçün göstərdiyi böyük fədakarlıqlara baxmayaraq, paralel şəkildə iqtisadiyyatını da böyütməyi bacarıb və bu gün mövcud inkişaf mərhələsinə çatıb. C. Yılmaz qeyd edib ki, Bakıda müşahidə olunan ümumi mənzərə və forumun keçirildiyi məkanda formalaşmış infrastruktur Azərbaycanın müstəqillikdən bu günədək keçdiyi inkişaf yolunu rəqəmlərdən əvvəl aydın şəkildə göstərir.
Vitse-prezident bildirib ki, Azərbaycan 2024-cü ildə 4,1 faiz iqtisadi artım göstəricisi ilə regionda seçilən iqtisadiyyatlardan biri olduğunu nümayiş etdirib. O, iki ölkə arasında ticarət dövriyyəsinin ötən il təxminən 8 milyard dollara çatdığını vurğulayaraq, bunun əhəmiyyətli göstərici olduğunu qeyd edib.

C. Yılmaz əlavə edib ki, bu il ticarət dövriyyəsində neft qiymətlərinin azalması və digər amillər səbəbindən müvəqqəti zəifləmə mümkündür, lakin bunun davamlı xarakter daşımayacağını bildirib. Onun sözlərinə görə, əsas məqsəd Azərbaycan və Türkiyə prezidentləri tərəfindən müəyyən edilən 15 milyard dollarlıq ikitərəfli ticarət hədəfinə nail olmaqdır.

Vitse-prezident qeyd edib ki, bu hədəfə işgüzar dairələrin fəal iştirakı ilə nail olunacağına inanılır. O, həmçinin Azərbaycanla Preferensial Ticarət Sazişinin təkmilləşdirildiyini və sənədin 2024-cü ildə qüvvəyə mindiyini xatırladaraq, bunun ikitərəfli ticarətə əlavə impuls verəcəyini bildirib. Bununla yanaşı, Azad Ticarət Sazişinin imzalanması imkanlarının araşdırılması məqsədilə işlərə başlanıldığını və bu istiqamətdə danışıqların davam etdiyini vurğulayıb.