BAKI, VOA

Əgər siz köhnə Ford Explorer, xüsusən də 2017–2019-cu il modelini idarə edirsinizsə, onun arxa asqısı zədələnmiş ola bilər. Problem sıradan çıxaraq qəzaya səbəb ola biləcək komponentləri əhatə edir. Buna görə də Ford bu problemi həll etmək və gələcəkdə hər hansı qəzanın qarşısını almaq məqsədilə 412 774 ədəd avtomobili geri çağırır.

VOA xəbər verir ki, geri çağırmanın təsirinə məruz qalan Explorer modellərinin arxa asqı qolları (toe links) qırılmağa meyllidir. Ford-un ABŞ Milli Avtomobil Yolları Hərəkətinin Təhlükəsizliyi İdarəsinə (NHTSA) təqdim etdiyi geri çağırma sənədinə əsasən, arxa asqı qolları yük altında qırıla bilər ki, bu da sükan idarəetməsini azaldaraq qəzaya səbəb ola bilər.

Problem əlamətləri arxa təkərin düzülüşünün pozulmasından tutmuş tıqqıltı səsinə və qeyri-normal idarəetməyə qədər dəyişə bilər. NHTSA hesabatında Ford bildirir ki, bu problemdən qaynaqlanan iki qəza barədə məlumatlıdır, lakin xəsarət alanlar barədə məlumat qeydə alınmayıb.

Şirkət problemin səbəbini hələ də araşdırdığını bildirir. Lakin avtomobil istehsalçısı hesab edir ki, çarpaz oxlu şaravoylar (cross-axis ball joints) tutula və arxa asqı qolunu əyə bilər ki, bu da son nəticədə hissənin qırılmasına səbəb olar.

Buna baxmayaraq, Ford sahiblərindən öz Explorer modellərini səlahiyyətli dilerə aparmağı xahiş edir. Orada köhnə arxa asqı qolları daha güclü və korroziyaya daha az meylli olan, tutulmuş şaravoylara qarşı müqavimətini artıran yenilənmiş versiyalarla əvəz ediləcək.

Avtomobil sahiblərinə 13 mart 2026-cı il tarixinədək poçt vasitəsilə bildiriş göndəriləcək. Təsirlənən modelləri artıq NHTSA-nın geri çağırmalar üzrə veb-saytında axtarmaq mümkündür.