BAKI,VOA, Fərid Mikayılov

Mançester Yunayted klub rəhbərliyi kapitan Bruno Fernandeşin yay transfer pəncərəsində “heç bir halda satılmayacağını” bəyan edib.

VOA xəbər verir ki, klub rəhbərliyi portuqaliyalı yarımmüdafiəçiyə bu qərarla bağlı şəxsi təminat verib və onu komandanın gələcək planlarının mərkəzi fiquru kimi gördüyünü bildirib.

Qeyd edək ki, mövsümün əvvəlində Fernandeşin təxminən 80 milyon funt sterlinq qarşılığında Səudiyyə Ərəbistanına transferi ilə bağlı iddialar yayılmışdı. Lakin sonradan klub daxilində mövqe dəyişib və rəhbərlik oyunçunu saxlamaq qərarına gəlib.

31 yaşlı futbolçu cari mövsümdə yüksək performans nümayiş etdirərək İngiltərə Premyer Liqasında 18 məhsuldar ötürmə ilə diqqət çəkir və mövsümün ən yaxşı oyunçusu mükafatına əsas namizədlərdən biri sayılır.

Klub hesab edir ki, onun komandada qalması həm nəticələrə, həm də kollektiv daxilində liderliyə ciddi təsir göstərir. Futbolçunun müqaviləsi 2027-ci ilə qədər qüvvədədir və əlavə bir illik uzatma imkanı da mövcuddur.