Fransız aktrisa Pom Klementyeff gələn ay Əbu-Dabidə keçiriləcək Yaxın Şərq Film və Komiks Festivalında ("Middle East Film and Comic Con") iştirak edəcək. Bu, onun pop-mədəniyyət festivalına ilk gəlişindən iki il sonra əmirliyə növbəti səfəri olacaq. "Marvel" kinokainatının "Qalaktika Mühafizəçiləri" filmlərindəki Mantis obrazı ilə məşhurlaşan Klementyeff sentyabrın 11-13-də "ADNEC Center Abu Dhabi" məkanında baş tutacaq üçgünlük tədbir çərçivəsində sentyabrın 11-i və 12-də pərəstişkarları ilə görüşəcək.
Başqalarının duyğularını hiss etmək və dəyişdirmək qabiliyyətinə malik yadplanetli empatiya qəhrəmanı ilk dəfə 2017-ci ildə ekranlara çıxan davam filmində təqdim olunub. Aktrisa həmçinin britaniyalı aktyor Ceyson Steytemlə birlikdə "Qarıçı 2" ("Beekeeper 2") filminin və "Mister" döyüş-komediya layihəsinin aktyor heyətinə qatılıb.
Klementyeff festivalda amerikalı güləşçi və aktyor Con Sina, "Netflix"in "One Piece" layihəsində Zoro obrazını canlandıran yapon aktyor Makkenyu və "Ulduz Döyüşləri" filmlərində Çubakka rolunu oynamış finlandiyalı aktyor Yonas Suotamo kimi ulduzlarla bir sırada yer alacaq.
2025-ci ildə 46 mindən çox ziyarətçini cəlb edən festival bu il rəssamlar xiyabanı, xüsusi anime və manqa zonası, kart oyunları arenası, kolleksiyaçılar qalereyası və qısametrajlı filmlər müsabiqəsi ilə yadda qalacaq.
Ötən il tədbirdə "Möhtəşəm Hörümçək-adam" filminin ulduzu Endrü Qarfild, "Qorxusuz: Yenidən Doğuluş" ("Daredevil: Born Again") serialının qəhrəmanları Çarli Koks və Vinsent D'Onofrio, "Qəribə Şeylər" ("Stranger Things") ekran əsərindən Nataliya Dayer və "Fleş" ("The Flash") rolunu canlandıran Qrant Qastin iştirak etmişdilər.
Klementyeff sonuncu dəfə bu festivalda 2024-cü ilin fevralında çıxış etmişdi.