BAKI, VOA
Əsl adı Nuhad Həddad olan Feyruz, 21 noyabr 1935-ci ildə Livanın Cəbəl Əl Ərz şəhərində anadan olub. Atası Vədi Həddad, Türkiyənin Mardin vilayətindən olan, Süryani pravoslavlığına mənsub, lakin sonradan maruniliyi qəbul edən bir şəxs, anası isə maruni xristian Liza əl-Bustani idi. Feyruz, bəstəkar Mohamed Flayfelin köməyi ilə Livan Radio Xoruna seçildi və radio direktoru Halim Elrumi vasitəsilə Assy Rahbani və Mansur Rahbani qardaşları ilə tanış oldu. Rahbani qardaşları ənənəvi ərəb mahnılarını və bəzi Qərb musiqilərini yenidən tərtib etdilər və bu görüşdən sonra Feyruz onların əsərlərini ifa etməyə başladı. Onun ən məşhur mahnılarından biri olan "Nehna Wel Amar Jiran" da Rahbani qardaşlarının əsəridir və Feyruzun ilk ifa etdiyi mahnıdır.
1955-ci ilin iyul ayında Feyruz, Rahbani qardaşlarından Assy Rahbani ilə evləndi və Beyrutun şimalındakı Antelias şəhərinə köçdü. Bir il sonra onların Ziyad adlı oğlu dünyaya gəldi.
Feyruz, Rahbani qardaşları ilə birlikdə ərəb dünyasında böyük populyarlıq qazandı və Qərbə də təsir etdi. 1971-ci ildə Qərbdə uğurlu musiqi turu keçirərək Nyu Yorkda Carnegie Hall, Londonda Albert Hall və Parisdə Olimpiada konsertlərində çıxış etdi. Onun mahnıları yalnız ərəb dünyasında deyil, türk musiqisində də əksini tapdı. Məsələn, Türk müğənniləri Ajda Pekkan, Ferdi Özbeğen və Semiha Yankı Feyruzun bəstələdiyi mahnıları ifa etmişlər.
Feyruz yalnız kütlə qarşısında konsertlər vermiş, dövlət rəsmiləri qarşısında fərdi konsertlərdən isə imtina etmişdir. Bu yanaşma onu cəmiyyət arasında daha da sevilən və qəbul edilən bir sənətkar edib.
2015-ci ildə onun həyatına dair Fransada sənədli film çəkilmişdir. Bu film Feyruzun həyatının bilinməyən tərəflərini livanlılara tanıtmış, xüsusilə vətəndaş müharibəsi dövründə ölkəni tərk etmək məcburiyyətində qalan Feyruzun, Livana qayıtması livanlılar üçün bir ümid işığı olmuşdur.
Feyruzun musiqilərində təkcə Yaxın Şərq musiqisində eşitdiyimiz ud, qanun kimi alətlər deyil, həmçinin violonçel, skripka və piano kimi Qərb musiqisinə xitab edən alətlərdən də istifadə edilmişdir.