BAKI,AzerVoice

Gürcüstan Xarici İşlər Nazirliyində Türkmənistanın bu ölkədəki səfiri Dövlətmurat Seyitmammedov ilə Gürcüstanın Qlobal məsələlər üzrə Siyasi İdarəsinin direktoru Kaxa Sixarulidze arasında görüş keçirilib.

AzerVoice xəbər verir ki, görüşdə iki ölkə arasında ikitərəfli və çoxtərəfli əməkdaşlığın mövcud vəziyyəti və gələcək inkişaf perspektivləri ətraflı müzakirə olunub.

Tərəflər Türkmənistan–Gürcüstan əlaqələrinin siyasi-diplomatik, ticarət-iqtisadi və humanitar-mədəni sahələrdə möhkəmləndirilməsi məsələlərinə xüsusi diqqət ayırıblar. Xarici işlər nazirlikləri arasında daimi siyasi məsləhətləşmələrin keçirilməsi və qarşılıqlı səfərlərin intensivləşdirilməsi imkanları nəzərdən keçirilib.

Görüş zamanı vurğulanıb ki, Prezident Serdar Berdimuhammedov və Baş nazir İrakli Kobaxidzenin qarşılıqlı siyasi iradəsi sayəsində Türkmənistan ilə Gürcüstan arasında etimada əsaslanan əməkdaşlıq uğurla inkişaf edir və yeni mərhələyə qədəm qoyur.

Tərəflər BMT və digər beynəlxalq platformalarda əməkdaşlığın genişləndirilməsi məsələlərini də müzakirə ediblər. Xüsusilə 2025-ci il 5–8 avqust tarixlərində Türkmənistanın "Avaza" Milli Turizm Zonasında keçiriləcək BMT-nin Dənizə Çıxışı Olmayan İnkişaf Etməkdə Olan Ölkələr üzrə III Konfransına (LLDC3) hazırlıq prosesi diqqət mərkəzində olub.

Görüşün sonunda hər iki tərəf siyasi dialoqun davam etdirilməsinin və mövcud əməkdaşlığın vacibliyini vurğulayıb. Türkmənistan və Gürcüstan praktiki əməkdaşlığın daha da dərinləşdirilməsi istiqamətində birgə fəaliyyətə hazır olduqlarını bir daha bəyan ediblər.