BAKI,VOA

Türkiyənin Diyarbəkir vilayətinin Bismil rayonunda potensial olaraq Gabar yatağından bir neçə dəfə böyük olduğu bildirilən şist neftinin hasilatı üçün qazma işlərinə başlanılıb.

Enerji və Təbii Sərvətlər naziri Alparslan Bayraktar ABŞ şirkəti ilə birlikdə bölgədə şist neftinin çıxarılması üzrə işlərin başladığını açıqlayıb.

Məlumata görə, Bismil və Silvan ərazilərində 7 min kvadrat kilometrlik bloklarda aparılan araşdırmalar təxminən 6,1 milyard barel neft ehtiyatı potensialını göstərir. Ehtiyatların cari bazar dəyərinin 540 milyard dollar civarında olduğu bildirilir.

Layihə çərçivəsində neftin süxurların daxilindən çıxarılması üçün şaquli və üfüqi qazma üsullarından istifadə edilir. İlk mərhələdə Bismildə 3-4 kilometr üfüqi qazma aparılır. Növbəti üç il ərzində bölgədə 24 quyu qazılması planlaşdırılır.

Türkiyə bu yataqdan gələcəkdə gündəlik hasilatı 250 min barrelə çatdırmağı və ölkə iqtisadiyyatına illik 8 milyard dollar gəlir gətirməyi hədəfləyir.

Layihə üzrə türkiyəli mühəndislərin ABŞ-da təlim keçməsi və gələcəkdə şist neftinin hasilatı üzrə yerli texniki imkanların formalaşdırılması da nəzərdə tutulur. Bundan sonra Trakyada şist qazının axtarışı üzrə işlərə başlanması planlaşdırılır.