BAKI,VOA Orxan Qədirzadə

Türkiyə, Səudiyyə Ərəbistanı və Pakistan arasında imzalanan Məkkə Birgə Müdafiə Sazişi NATO və digər mövcud ittifaqlara alternativ yaradılması məqsədi daşımır.

Türkiyənin vitse-prezidenti Cevdet Yılmaz CNN Türk telekanalına açıqlamasında bildirib ki, saziş hər hansı ölkəyə və ya bloka qarşı yönəlməyib və əsas məqsəd regional təhlükəsizliyi gücləndirməkdir.

“Bu, kiməsə qarşı yaradılmış struktur deyil. Əksinə, müəyyən məsələlərdə gərginliklərin yaranmaması üçün çəkindiriciliyi gücləndirmək məqsədilə formalaşdırılmış mexanizmdir”, - Yılmaz deyib.

“İran əleyhinə yaradılmış struktur kimi qiymətləndirilməməlidir”

Yılmaz bildirib ki, Məkkə Sazişi yalnız müdafiə sahəsində deyil, müdafiə sənayesi və digər istiqamətlərdə əməkdaşlığın genişləndirilməsini də nəzərdə tutur.

Onun sözlərinə görə, sazişin İrana qarşı yönəlmiş ittifaq kimi təqdim edilməsi düzgün deyil.

“Bunu qətiyyən İrana qarşı yaradılmış struktur kimi görmək lazım deyil. Bu, hər hansı ölkəyə, tərəfə və ya qrupa qarşı yönəlmiş mexanizm deyil. Haradan yaranmasından asılı olmayaraq mümkün risklərə qarşı çəkindirici mexanizmdir”, - Türkiyənin vitse-prezidenti vurğulayıb.

Saziş genişlənə bilər

Yılmaz Məkkə Sazişinin gələcəkdə digər ölkələrin iştirakı ilə genişlənə biləcəyini də istisna etməyib.

Misirin niyə sazişə qoşulmadığı ilə bağlı suala cavab verən Yılmaz bildirib ki, gələcək genişlənmənin istiqamətini üç ölkənin ortaq mövqeyi müəyyən edəcək.

“Misir çox dəyərli və mühüm ölkədir. Həm hərbi, həm coğrafi, həm də əhali baxımından böyük gücə malikdir. Qarşıdakı dövrdə bu struktura yeni üzvlərin qoşulması mümkündür. Bu, açıq strukturdur. Lakin buna üç ölkə birlikdə qərar verəcək”, - deyə o qeyd edib.

KAAN layihəsində Səudiyyə Ərəbistanının iştirakı mümkündür

Türkiyənin milli döyüş təyyarəsi KAAN layihəsində Səudiyyə Ərəbistanının mümkün iştirakı barədə danışan Yılmaz belə əməkdaşlığın mümkün olduğunu bildirib.

Onun sözlərinə görə, yüksək maliyyətli və böyük bazar tələb edən müdafiə layihələrində müxtəlif ölkələrin prosesə cəlb edilməsi texnoloji və iqtisadi baxımdan əhəmiyyətlidir.

“KAAN da, digər layihələr də ola bilər. Bir çox ölkəni məhsul səviyyəsində prosesə cəlb edən, məsuliyyətləri bölüşdürən və onların töhfələrindən istifadə etməklə layihələrin keyfiyyətini artıran yanaşmanın doğru olduğunu düşünürəm”, - Yılmaz deyib.

Suriya və İraqla bağlı əməkdaşlıq

Yılmaz Türkiyə ilə Səudiyyə Ərəbistanı arasındakı əməkdaşlığın Suriya və İraqa da müsbət təsir göstərə biləcəyini bildirib.

O qeyd edib ki, Suriyanın yenidən qurulması istiqamətində artıq müəyyən əməkdaşlıq prosesləri başlayıb və ölkədə sabitliyin təmin olunması Türkiyənin təhlükəsizliyi baxımından da mühüm əhəmiyyət daşıyır.

“Ətrafımızdakı ölkələr nə qədər sabit və firavan olarsa, Türkiyə olaraq biz də bir o qədər irəli gedərik”, - Yılmaz əlavə edib.

Pakistanla hərbi əməkdaşlıq dərinləşəcək

Türkiyə və Pakistan arasında müdafiə sahəsində əməkdaşlığın da Məkkə Sazişi çərçivəsində daha da inkişaf edəcəyi bildirilib.

Yılmazın sözlərinə görə, üç ölkənin orduları arasında daha sıx dialoq, təcrübə mübadiləsi və hərbi standartların uyğunlaşdırılması istiqamətində işlər aparılacaq.

O, əməkdaşlığın ordular arasında qarşılıqlı təcrübə paylaşımını, standartların yaxınlaşdırılmasını və birgə fəaliyyət imkanlarının artırılmasını əhatə edəcəyini vurğulayıb.