BAKI,VOA Orxan Qədirzadə

Türkiyənin Daxili İşlər Nazirliyi yanında Miqrasiya İdarəsi 2026-cı il iyulun 30-na olan qeyri-qanuni miqrasiya və miqrant qaçaqmalçılığı ilə bağlı aktual statistik məlumatları açıqlayıb. Məlumata görə, 2026-cı ilin ilk 7 ayında Türkiyədə 82 min 701 qeyri-qanuni miqrant saxlanılıb.

Qurumun məlumatında qeyd olunub ki, təkrar qeydiyyatlar çıxıldıqdan sonra real göstərici 74 min 513 nəfər təşkil edib.

Statistikaya əsasən, Türkiyədə qeyri-qanuni miqrasiya ilə bağlı saxlanılan şəxslərin sayı son illərdə azalma tendensiyası nümayiş etdirir. 2019-cu ildə 454 min 662 nəfərlə ən yüksək həddə çatan göstərici sonrakı illərdə tədricən aşağı düşüb.

Belə ki, qeyri-qanuni miqrantların saxlanılması üzrə göstərici 2022-ci ildə 285 min 27 nəfər, 2023-cü ildə 254 min 8 nəfər, 2024-cü ildə 225 min 831 nəfər, 2025-ci ildə isə 160 min 253 nəfər olub.

2026-cı ildə aylıq göstəricilər

2026-cı ilin ilk 7 ayında qeyri-qanuni miqrantların saxlanılması hər ay orta hesabla 10-12 min nəfər aralığında dəyişib.

Yanvar ayında 11 min 949, fevralda 10 min 661, martda 11 min 620, apreldə 12 min 435, mayda 11 min 259, iyunda 12 min 901, iyulda isə 11 min 876 qeyri-qanuni miqrant saxlanılıb.

Beləliklə, iyul ayının sonuna ümumi göstərici 82 min 701 nəfərə çatıb.

Əfqanıstan vətəndaşları ilk sıradadır

2026-cı ildə Türkiyədə saxlanılan qeyri-qanuni miqrantların vətəndaşlıq bölgüsündə Əfqanıstan vətəndaşları üstünlük təşkil edib.

Belə ki, ilin ilk 7 ayında 22 min 483 Əfqanıstan vətəndaşı saxlanılıb. Siyahıda Suriya vətəndaşları 11 min 456 nəfərlə ikinci, Özbəkistan vətəndaşları isə 6 min 128 nəfərlə üçüncü yerdə qərarlaşıb.

İlk onluqda İran (5 min 602), Türkmənistan (5 min 339), İraq (3 min 829), Mərakeş (2 min 327), Misir (2 min 26), Əlcəzair (1 min 634) və Efiopiya (1 min 622) vətəndaşları da yer alıb.

Digər ölkələrin vətəndaşları üzrə göstərici isə 20 min 255 nəfər təşkil edib.

Miqrant qaçaqmalçılığı ilə mübarizə əməliyyatları

Türkiyədə miqrant qaçaqmalçılığına qarşı keçirilən əməliyyatların sayı 2024-cü ildə rekord həddə çataraq 13 min 61 olub.

Sonrakı illərdə bu göstəricidə azalma müşahidə edilib. Belə ki, 2023-cü ildə 10 min 482, 2025-ci ildə 11 min 588 əməliyyat və aşkarlama həyata keçirilib.

2026-cı ilin iyulun 30-na olan məlumata əsasən isə miqrant qaçaqmalçılığı ilə bağlı 6 min 919 əməliyyat və aşkarlama qeydə alınıb.

Mütəxəssislərin fikrincə, Türkiyənin coğrafi mövqeyi onu Asiya, Yaxın Şərq və Avropa istiqamətində miqrasiya marşrutlarının əsas keçid nöqtələrindən birinə çevirir. Bu səbəbdən ölkə qeyri-qanuni miqrasiya ilə mübarizədə sərhəd nəzarəti, geri qaytarma və hüquq-mühafizə tədbirlərini davam etdirir.