BAKI, VOA, Fərid Mikayılov

Ankara 9-cu Ağır Cinayətlər Məhkəməsi, 11 may 2013-cü ildə Hatay vilayətinin Reyhanlı rayonunda 53 nəfərin ölümü ilə nəticələnən dəhşətli terror aktı davası üzrə təqsirləndirilən şəxslər – Memet Gezer, Cengiz Sertel və Temir Dükancı barəsində çıxarılan məhkumiyyət hökmünün əsaslandırılmış qərarını açıqlayıb.

VOA xəbər verir ki, hüquqi sənəddə qətliamın planlaşdırılmasından maliyyələşməsinə qədər bütün detallar xronoloji sübutlarla ortaya qoyulub və terror aktının birbaşa Bəşşar Əsəd rejiminin kəşfiyyat orqanları tərəfindən idarə olunduğu rəsmən təsdiqlənib.

Hücumda istifadə edilən və yüksək dağıdıcı gücə malik "RDX" tərkibli partlayıcılar Suriya kəşfiyyatçıları Nişan İncecikyan və "Hacı" kod adlı Muhammedin rəhbərliyi ilə balıqçı qayıqları vasitəsilə 5 dəfəyə Hatay sahillərinə çıxarılıb. Milyonlarla dollarlıq vədlərlə hərəkət edən terrorçular, diqqət çəkməmək üçün avtomobillərə xüsusi gizli yanacaq çənləri quraşdıraraq bombaları Reyhanlıya çatdırıblar.

Partlayışlar nəticəsində 53 nəfər şəhid olub, 912 ev, 891 iş yeri və 148 nəqliyyat vasitəsinə ciddi ziyan dəyib. Ağır nəticələri nəzərə alan məhkəmə, hər üç məhkuma 53 dəfə ağırlaşdırılmış ömürlük həbs və əlavə olaraq 3921 il azadlıqdan məhrumetmə cəzası verib, onlara heç bir "təqdiredici yüngülləşdirici hal" (endirimi) tətbiq etməyib. Yüngül yaralanan bəzi zərərçəkmişlərlə bağlı bəndlər 12 illik iddia müddətinin (11 may 2025-ci ildə) bitməsi səbəbindən düşsə də, bu, əsas hökmə təsir göstərməyib.