BAKI,VOA, Fərid Mikayılov

Hakan Fidan Xorvatiyanın Dubrovnik şəhərində keçiriləcək Üç Dəniz Təşəbbüsü Zirvəsində Türkiyəni “strateji tərəfdaş” statusunda təmsil edəcək.

VOA xəbər verir ki, Türkiyə bu təşəbbüsü regional rəqabət deyil, əməkdaşlıq və tamamlayıcılıq platforması kimi görür.

Rəsmi Ankara Orta Dəhliz və İnkişaf Yolu layihələri vasitəsilə qlobal ticarətdə mühüm tranzit mərkəzə çevrilməyi hədəfləyir.

Bildirilib ki, Fidan zirvə çərçivəsində çıxışında bağlantısallığın yalnız fiziki infrastrukturla məhdudlaşmadığını, enerji, nəqliyyat, rəqəmsal şəbəkələr və maliyyə sahələrini də əhatə edən kompleks sistemə çevrildiyini vurğulayacaq.

Eyni zamanda, qlobal münaqişələrin iqtisadiyyata və təchizat zəncirlərinə təsirinə diqqət çəkiləcəyi, enerji marşrutlarının şaxələndirilməsinin vacibliyinin qeyd olunacağı gözlənilir.

Türkiyənin bu təşəbbüsü inklüziv platforma kimi qiymətləndirdiyi və əməkdaşlığın genişləndirilməsinə hazır olduğu da vurğulanacaq.

Qeyd edək ki, Üç Dəniz Təşəbbüsü 2015-ci ildə Andrzej Duda və Kolinda Grabar-Kitarović təşəbbüsü ilə yaradılıb. Layihə Baltik, Adriatik və Qara dəniz regionlarında yerləşən ölkələr arasında enerji, nəqliyyat və rəqəmsal infrastrukturun inkişafını hədəfləyir.