BAKI,VOA, Nailə Babazadə

Türkiyənin Xarici İşlər naziri Hakan Fidan suriyalı həmkarı Şeybani ilə keçirdiyi ortaq mətbuat konfransında regiondakı son hərbi-siyasi vəziyyəti dəyərləndirib.

VOA xəbər verir ki, nazir Fidan xüsusilə ABŞ və İran arasında əldə olunmuş atəşkəs prosesinə toxunaraq, İsrailin bu prosesi pozma ehtimalı olan "sabotaj həmlələri" barədə beynəlxalq birliyə ciddi xəbərdarlıq edib.

Hakan Fidan bildirib ki, regionda sülhün qalıcı olması üçün tərəflər konstruktiv mövqe nümayiş etdirməlidir. İsrailin mümkün təxribatlarına qarşı dünya ictimaiyyətinin ayıq-sayıq olmasının vacibliyini vurğulayan nazir: "Dünya ictimaiyyəti İsrailin ehtimal olunan sabotaj həmlələrinə qarşı lazımi reaksiyanı göstərəcək vəziyyətdə olmalıdır. İsrailin sabotajlarına qarşı ağıllı şəkildə hərəkət edilməlidir", – deyə qeyd edib.

Nazir Fidan çıxışında İsrailin hərbi fəaliyyətlərini sərt tənqid edərək, Qəzzada baş verən hadisələrin artıq Livana sıçradığını diqqətə çatdırıb. O, İsrailin hücumlarını qadın və ya uşaq fərqi qoymadan həyata keçirdiyini və bu vəziyyətin humanitar fəlakəti daha da dərinləşdirdiyini bildirib. Türkiyənin regionda sabitliyin təmin olunması üçün diplomatik səylərini davam etdirəcəyi bəyanatın əsas mesajlarından biri olub.